في لغات كتيرة جدًا بتستخدم الحروف العربية، والخط العربي بيفنن وبيصمم الكتابة، وأشكاله متنوعة لمرونة الحروف العربية، ولإنها بتنساب بسهولة، وأشكاله واضحة، فمحبي الخط العربي قدروا يخترعوا ويبتكروا أشكال متنوعة منها، وأنواعه مابتنتهيش، وبما إن النهارده اليوم العالمي ليه فتعالوا نعرف معلومات أكتر ممكن ماتكونوش عارفينها عن الخط العربي.
والخط العربي تجدد من خلال مرحلتين، الأولى لما انتشر الإسلام في بلاد خارج الجزيرة العربية، وبقت اللغة العربية الأكتر استعمال في مجالات كتير، وبعد كده تم إنشاء العديد من مدارس الخط، وأشكال خاصة زيّ، الخط الديواني اللي أنشأه الأتراك، وخط التعليق اللي تم إنشاءه في بلاد فارس، وأول خطوات التجديد في الكتابة العربية كانت في عصر الدولة الأموية، لما أسس أبو الأسود الدؤلي علم النحو، وزود نظام التنقيط الخاص برسم الحركات، وتم كتابة القرآن الكريم وقتها بلونين مختلفين بالأصفر والأحمر لعلامات الإعراب وبالأسود للحروف، أما المرحلة التانية لما أدرج الخليل بن أحد الفراهيدي طريقة مختلفة للتشكيل مش بتعتمد على الألوان، ولكن على رموز متنوعة لرسم الشدّة، والحركات، والهمزة.
وأنواع الخطوط العربي كتيرة ومنها الكوفي، والنسخ، والرقعة، والمغربي، والمكي والمدني، والكرشمة، والوسام، والطومار، والثلث، والفارسي، والديواني، والسنبلي، والبهاري، والقدوسي، والحر.. وكمان من الحاجات اللي بتبين جمال اللغة العربية إن للكلمة الواحدة ممكن تلاقي كذا معنى أو درجة ليها زيّ كلمة الحب فهي ليها 14 درجة في العربي وهما الهوى، والصبوة، والشغف، والوجد، والكلف، والعشق، والنجوى، والشوق، والوصب، والاستكانة، والود، والخُلة، والغرام، والهيام.
ورغم إن اللغة العربية ممكن يكون مش سهل إن أي حد يتعلمها لو مش عربي، بس المشاهير العالمية دايمًا بيحرصوا إنهم يعبروا عن حبهم ليها حتى لو مش بيعرفوا يتكلموها، ومن ضمن المشاهير دول عارضة الأزياء الأمريكية ذات الأصول الفلسطينية بيلا حديد اللي ظهرت من قريب بوشمين “أحبك”، و”حبيبتي”.
