مرض الزهايمر من أصعب الأمراض اللي بتسبب فقدان للذاكرة، التشوش، وعدم القدرة على التفكير بشكل منطقي أو سليم. أسباب الإصابة بالمرض إلى الآن الأطباء مقدروش يتيقنوا 100% منها. لكن الدراسات الطبية أثبتت إن من الحاجات اللي بتسبب خطر الإصابة بالزهايمر، الالتهاب في الدماغ وعوامل الخطر المتعلقة بالأوعية الدموية ونمط الحياة. وبالنسبة لطرق الوقاية، فمفيش كمان أساليب مؤكدة للوقاية التامة لكن بينصح الأطباء المتخصصين بالقيام ببعض الحجات اللي بتحافظ على الصحة بشكل عام وبالتالي ممكن تقي من مرض الزهايمر.
ممارسة الرياضة
وفقًا للدكتور مارشال ومقالته في موقع جامعة هارفارد، إن الدليل الأكثر إقناعًا للوقاية من مرض الزهايمر هو أن التمارين البدنية بتساعد في منع تطور مرض الزهايمر أو إبطاء تقدم الأشخاص اللي بيعانوا من الأعراض. وعلشان كده بيتم التوصية بـ30 دقيقة من التمارين، خصوصًا التمارين الهوائية “aerobics” من ثلاثة لأربع أيام في الأسبوع.
تناول نظام غذائي متوازن و مراقبة عوامل الخطر على الأوعية الدموية
المحافظة على نظام غذائي متوازن زى النظام الغذائي “لدول البحر المتوسط” اللي بيكون غني بالخضراوات والفواكه والبروتين الخالي من الشحوم وبتحتوي على الأحماض الدهنية أوميجا 3. بالإضافة لضرورة مراقبة ارتفاع ضغط الدم وارتفاع الكوليسترول والسكر باستمرار، لإنها من العوامل اللي ممكن تؤدي للإصابة بالمرض.
استخدام مهارات التفكير في ألعاب الذاكرة
في ألعاب بتساعد على تنشيط الصحة العقلية زى ألعاب الألغاز، الكلمات المتقاطعة، الشطرنج وغيرها من الألعاب والأنشطة اللي بتطلب تفكير ذهني، وبالتالي بتحافظ على خلايا المخ من التلف، كمان ألعاب الفيديو والـ PlayStation بتخلي العقل يقظ ونشيط لفترة طويلة.
المواظبة على القراءة والكتابة
النوع ده من النشاطات الذهنية بتعمل على تشغيل وظائف المخ وتنشيطه وعلشان كده ممكن يساعد في الوقاية من المرض في حالة الانتظام عليهم.