احتفال بيوم من أهم أيام السنة، يوم الشيء اللي بيصلح مشاكلنا النفسية في دقيقة.. جرّب كده تدي شوكولاتة لحد متضايق وشوف تغير رد فعله في ثواني، ودلوقتي كمان حظنا أحلى علشان مفهوم الشوكولاتة مابقاش مقتصر على قطعة الشوكولاتة وخلاص، في كمية اختراعات منغنغة بالشوكولاتة، مع كيك أو أي حاجة تانية، حرفيًا أي حاجة بتتحط عليها الشوكولاتة بتبقى في حتة تانية، فعلشان كده لو أنت من الناس اللي بتحب الشوكولاتة، جيبنا لك أشهر أماكن في البلاد العربية بتلعب بالشوكولاتة في أطباق مختلفة.
House Of Cocoa – مصر
شوكولاتة على وافل، بان كيك، مولتن كيك، حتى الكنافة والبسبوسة وحلويات رمضان، مغرقين حياتك بحلويات متغرقة شوكولاتة، والميزة كمان إن فروعهم كتير وتقريبًا موجودة في كل مكان في القاهرة؛ في مصر الجديدة ومدينة نصر والمعادي ومدينتي والتجمع وأكتوبر، يعني لو أنت من النص الطيب “التجمع” أو من الجهة الأخرى من النهر والنص الشرير “أكتوبر وزايد” في الحالتين هتروح الفرع القريب ليك بسهولة.
Dip n Dip – لبنان
بفروع في لبنان ومصر وكمان قطر، Dip n Dip في لبنان بيقدم أكتر من نوع من الحلويات وكلهم غرقانين في الشوكولاتة زيّ ما هتشوف في الصور، بيتفنن في أنواع حلويات جديدة ومختلفة تتقدم في الشرق الأوسط بمزج بين أطباق شرقية وغربية، بيجمعهم حب الشوكولاتة. بـ 13 فرع في بيروت، قرر يغزو بيروت ويغرقها في الشوكولاتة، يعني وأنت في أي مكان فيها هتقدر تلاقيه بسهولة.
Aani & Dani – السعودية
من 1998 بيقدموا أشكال مختلفة من الشوكولاتة والكيك والماكرون بطابع سعودي، وبيتفننوا دايمًا في إبداع أطباق جديدة علشان تعجب كل اللي بيحبوا الشوكولاتة والحلويات، 20 فرع في المملكة، بيسهلوا عليك إنك تعيش التجربة دي في مكان قريب منك كمان.
Godiva Chocolate Cafe – الإمارات
الفرع في مول الإمارات، بيفتح من 8 الصبح لـ 11 بليل، والمكان ده أغلب الأطباق اللي بتتقدم بالشوكولاتة فيه مش هتندم عليها، باختراعات كتير هتناسب ذوقك في الحلويات سواء حاجات سخنة أو حاجات باردة، لكنه بيكون مميز جدًا في الشتاء، علشان تقدر تشرب هوت شوكليت مع كيكة شوكولاتة سخنة، تقدر تقاوم بيها البرد وأنت قلبك بيرقص.
Maya La Chocolaterie – البحرين
من 3 العصر لـ 10 بليل، تقدر تخوض تجربة مختلفة بالشوكولاتة في البحرين، تحديدًا في شارع 1205 محل رقم 155، ده غير إنهم بيعملوا اختراع كيكة بالشوكولاتة خالية من السكر والجلوتين، وفي نفس الوقت شكلها مغري بالشوكولاتة اللي عليها، وهي اللي موجودة في الفيديو ده:
بس خلّي بالك، هما أجازة يوم التلات.
Showcolat Ennasr – تونس
من 2013 بيقدم اختراعات بصوص الشوكولاتة، وكمان باختيار الشوكولاتة البيضاء لو أنت من الناس اللي بتحبها، سواء مع كيك أو كمان فواكه، ومن الصور هتلاحظ إنه بيهتم أكتر بالفواكه مع الشوكولاتة، ودي حاجة مش منتتشرة بشكل كبير وده اللي بيميزه. المكان موجود في كمباوند تسنيم، رقم 6.
La Roche Chocolate – الأردن
في شارع الأميرة تغريد محمد، في عمّان، تقدر تجرب المكان ده لإنه بيقدم أطباق وعلب الشوكولاتة بشكل مميز وباختلافات، غير طبق الشوكولاتة اللي متعودين نهادي بيه الناس اللي هتزورهم وخلاص، هتلاقي اختيارات كتير لعلب الشوكولاتة هتقرر تجيبها لنفسك مش لناس هتزورهم، وهتحب تجرب الأنواع المختلفة دي.