برغم إن سنة 2020 ماكنتش سهلة خالص على الكل، إلا إن معظم الدول العربية قررت تبتدي بداية مختلفة تمامًا بالسنة الجديدة وتحتفل بشكل مبهر ومفرح مع شعوبها، علشان تضيف روح البهجة والتفاؤل بالسنة الجديدة! ومن الدول اللي أبدعت وبجدارة في احتفاليات رأس السنة، هي دولة الإمارات العربية، فحطم مهرجان الشيخ زايد في الإمارات رقمين قياسيين عالميين، بالألعاب النارية “fireworks” اللي استخدمت في فعاليات الاحتفال. ومن ساعة ما شوفنا الاحتفال المبهر، الكل على السوشيال ميديا بينشر مقاطع وصور من الاحتفاليات، اللي فعلًا ماكنش ليها مثيل.
فلأول مرة في العالم، تم استخدام تقنية الـ”Girandola” لتحطيم الرقم القياسي في عدد الطلقات بإطلاق 300 طلقة “Girandola” في 30 ثانية بس، وكمان تم للمرة الأولى في العالم تحطيم الرقم القياسي المسجل بموسوعة “جينيس” لأضخم عرض ألعاب نارية بأكبر عدد طلقات بخط مستقيم.. وأضاءت الألعاب النارية منطقة الوثبة لمدة 35 دقيقة متواصلة، وتم إطلاقها من 16 برج بتشكيلات وألوان مختلفة، اللي مش بس أبهرت الحضور ولكنها أبهرت كل اللي اتفرج عليها من العالم كله.. وكمان كان في احتفاليات مبهرة من برج خليفة بدبي اللي أبهر العالم كله بالتقنيات الحديثة المستخدمة والألعاب النارية الضخمة اللي الكل اتفرج عليها بانبهار وسعادة.
وطبعًا تمت كل الاحتفاليات دي، بتطبيق الإجراءات الاحترازية لفيروس كورونا، فاللجنة العليا المنظمة للمهرجان كانت حريصة على سلامة الجميع وسط الاحتفالات، فتم توفير آلاف الكمامات اللي اتوزعت مجانًا على الجمهور وكمان زيادة تواجد عبوات سائل التعقيم في جميع مناطق وبوابات المهرجان، وقياس حرارة الحضور عند بوابات الدخول.