في السنين الأخيرة اللي فاتت قدرت السينما المصرية تتحدى كل الظروف وتخرجلنا مجموعة من الأفلام المهمة، ومن الأفلام دي كان فيلم 122 اللي تم اختياره ضمن قائمة أفضل 100 فيلم لسنة 2020 وفقًا لموقع “Stacker” العالمي اللي بيعتمد على بيانات موقع IMDB، وMetascore، بعد ما تم التصويت من الجمهور.. والمميز كمان إنه الفيلم العربي الوحيد اللي كان ضمن القائمة دي.
فيلم 122 هو فيلم مصري من بطولة طارق لطفي، وأمينة خليل، وأحمد الفيشاوي، وأحمد داوود، ومحمد لطفي، وأسماء جلال.. والفيلم من تأليف صلاح الجهينى وإخراج ياسر الياسري، إنتاج شركة مقام. أما بالنسبة لنوع الفيلم، فبينتمي لتصنيف الرعب والتشويق. وطبعًا أكيد ده خبر يستدعي الفرحة والفخر.. فسألنا أسماء جلال أحد أبطال المسلسل عن شعورها لما عرفت الأخبار وكمان عن التحديات اللي واجهتها أثناء تصوير الفيلم.
لما سألناها عن شعورها لما عرفت الخبر، قالت أسماء إنها فرحت جدًا وكمان اتفاجأت لإنها ماكنتش متوقعة حاجة زيّ دي، أما بالنسبة للتحديات فقالت إنها كانت خايفة من التجربة جدًا خصوصًا إن ده أول فيلم ليها، فكانت متخوفة من الموضوع بشكل عام وإن الناس ماتحبهاش في الفيلم لإنهم اتعودوا يشوفوها في مسلسلات قبل كده.. وكمان لإن الفيلم كانت ظروفه صعبة لإنه فيلم أكشن فكان في كتير من مشاهد قتل وضرب النار، ولكن برغم التحديات ففي النهاية الفيلم طلع بشكل جيد جدًا ولقى إعجاب الجمهور.