السفارة الفرنسية في مصر أعلنت إن فرنسا هتقدم مساعدات لمصر بقيمة 15 مليون يورو لدعم مجهودات اللي الحكومة المصرية بتقدمها في مواجهة فيروس الكورونا اللي لحد دلوقتي صاب حوالي 46 ألف مصري.
التطورات دي جت بعد ما وزيرة الصحة والسكان المصرية هالة زايد ووزيرة التعاون الدولي رانيا المشاط اجتمعوا بالسفير الفرنسي في القاهرة ستيفان روماتيه ورئيس منظمة التطوير الفرنسية فابيو جرازي ووقعوا اتفاقية هتدعم فيها المنظمة مصر بمساعدات قيمتها 15 مليون يورو.
المساعدات دي هتمكن مصر من شراء مسلتزمات طبية لحماية الأطقم على الخطوط الأولى من خطر انتشار العدوى.
بالإضافة لده الإتحاد الأوروبي وفر لمصر حوالي 89 مليون يورو للقطاع الطبي في مصر عشان يقدر يقاوم أزمة فيروس الكورونا وانتشاره في المحافظات المختلفة. مش بس مصر، لإن سفير الاتحاد الأوروبي في مصر إفان سركوس أعلن إن في مساعدات بقيمة 1.5 مليار يورو هيتم منحها لمصر والأردن وفلسطين وتونس والمغرب.
المساعدات دي هدفها دعم اقتصاد الدول دي في إنه يتماسك خلال الأزمة اللي أثرت على العالم كله، ويقويه للفترة الجاية عشان تبدأ مرحلة التعافي.