الساحل الشمالي بقى واحد من أهم تريندات الصيف في مصر، وده مش غريب لإن الساحل مصيف جميل وممتاز وكل حاجة موجودة فيه من مياه صافية وشواطيء جميلة، ده غير مطاعم من ماركات مختلفة ومواصلات سهلة ومتوفرة. ولكن وسط الهوس بالساحل اللي احنا عايشينه النهارده، فين المصايف القديمة اللي كنا بنروحها مع العيلة؟
في المقال ده، هنتكلم عن أهم 5 مصايف كنا بنروحها زمان ولسه جميلة وتستاهل نزورها في الصيف؛ علشان كل مصيف فيهم عنده ميزة مش بس جمالية، ولكن عاطفية هتضيف لوقتنا في الصيف قيمة أكبر.
رأس البر
رأس البر، اللي بيتقال عليها النهارده مصيف الغلابة، كانت زمان مصيف مهم جدًا ومقصد الأغنياء والطبقات الراقية في مصر، وكان بشوات وفنانين زمن الفن الجميل بيزوروها كل سنة زيّ أم كلثوم وأسمهان، والرئيس المصري الراحل جمال عبدالناصر. وعلاقة أسمهان برأس البر كانت شديدة الرومانسية، فيُحكى عن صديقة لها إنها اتمنت الموت في رأس البر، وبعد سنتين من أمنيتها دي وقعت عربيتها في ترعة على مدخل المدينة وماتت على أرض المدينة اللي بتحبها فعلًا.
يمكن الشواطئ في رأس البر النهارده مش جامدة زيّ شواطئ الساحل الشمالي، ولكن مايزال جو المدينة جميل جدًا، وشارع النيل اللي فيه كافيهات وكازينوهات وبيوت ذات طابع معماري تحفة هيرجعك تاني لأيام العيلة والدفء. ومن على اللسان اللي عند المنارة تقدر تشوف منظر جميل لالتقاء مياه البحر مع مياه النيل وتشوف الفرق ما بين لون مياه البحر ومياه النيل والفاصل ما بينهم، وتقدر تسهر هناك مع صحابك وهتنبسطوا جدًا.
كان بيعاني شارع النيل من مشكلة الإشغالات اللي بتضايق الناس اللي عايزة تستمتع، بس تم تنفيذ مشروع السوق الحضاري اللي حول الشارع لكورنيش بديع بينتهي بأجمل مكان في رأس البر، وهو اللسان اللي تم افتتاح مسرح مكشوف فيه.
وعندنا مشروعات ضخمة كتير اتعملت خلال السنين اللي فاتت في رأس البر وحولتها لمصيف أنضف وأجمل بكتير من اللي كان عليه قبل كام سنة، ومن المشاريع دي مشروع شمال وجنوب الصيادين اللي حول منطقة عشوائية مليانة عشش وبؤر عشوائية لمشروع سكني بيبص على النيل.
بلطيم
واحد من أهم المصايف القديمة بتاعتنا، وبلطيم هو مركز في محافظة كفر الشيخ بيطل على البحر المتوسط، وفي 2006 صدر قرار وزاري بتحويل المصيف ده لمدينة ساحلية وتجهيزها بكل الخدمات اللازمة لخدمة المصطافين، فتمت عمليات تطوير كتير منها توسعة الطرق ورصفها من أول مدخل النرجس والأمل وقدام مسجد النرجس ومنطقة الزهراء والنرجس والسلام، وتم تركيب منظومة لبوابات إلكترونية على جميع مداخل المدينة.
وكمان تم تشغيل منظومة الإنقاذ على كل الشواطئ من خلال توزيع أفراد ومشرفين إنقاذ مع كل المعدات والأدوات اللي ممكن يحتاجوها للإنقاذ سواء الأوناش السريعة أو الجيت سكي.
بيتميز جو بلطيم إن الرطوبة فيه قليلة جدًا أو منعدمة، والأمواج فيه أهدى بكتير من أمواج إسكندرية، وعلشان كده أمان أكتر لو هتسافر مع أطفال وعايز تطمن عليهم، وكمان الشاليهات والشقق هناك أسعارها رخيصة جدًا وتقدر تقضي فيه أسبوع كامل بألفين أو تلات ألاف جنيه بس.
بيتكون المصيف من 6 شواطئ بخلفية طبيعية جميلة من جبال الكثبان الرملية والنخل الكتير ومزارع العنب والتين اللي بتميز المنطقة، يعني هتبقى وسط البحر والطبيعة والمزارع والنخل، ومفيش أحلى من كده.
اسم بلطيم جاي من كلمة بطليموس، لإن البطالمة هما أول ناس عمروا المنطقة دي على ساحل البحر المتوسط، وللمنطقة دور مهم في التاريخ المصري، فهتلاقي فيها مدفع أثري بيتم نسبه لأحمد عرابي وفي قصة عن معركة تنسب لعرابي برضه، اللي هو الثائر المصري اللي قاد ثورة ضد الاحتلال الإنجليزي سنة 1882.
جمصة
مصيف جمصة موجود في شمال الدقهلية على ساحل البحر المتوسط، واللي الناس بتقول عليه “مصيف النقابات العمالية” بسبب أسعاره المنخفضة واللي بتناسب طبقات كتير.
اسم جمصة يرجع للحملة الفرنسية على مصر، واللي زارت المنطقة دي واتمركزت في تبة عرابي، وقبل ما الحملة تسيب المنطقة سموها جيمسا، ومعناها بالفرنسية “المكان الذي أحبه”، ومن هنا نشأت قرية في نفس المنطقة وتم تحوير الكلمة لحد ما بقت في العامية المصرية جمصة.
غير الهدوء وعدم الازدحام، بتتميز شواطئ جمصة بمياه صافية وجميلة ونسبة الرطوبة فيها قليلة معظم أيام السنة، علشان كده درجة الحرارة فيها أفضل بكتير من مصايف تانية، ورملتها الناعمة بتضيف جمال أكتر على الشواطئ، وكمان بتتميز بتراثها المعماري المميز اللي هتشوفه في مباني المدينة القديمة.
الأسعار في جمصة في متناول كل الناس ومش هتصرف كتير وأنت هناك، وتقدر تستمتع بالبحر والرملة والجو الجميل، وممكن كمان تزور دير القديسة دميانة هناك، وده دير بتتجلى فيه تحفة الفن القبطي.
إسكندرية
هتقولي ماحدش بقى بيصيف في إسكندرية، هقولك بالعكس إسكندرية فيها شواطئ كتير والشواطئ بتاعتها أتجددت وبقت تحفة، وأسعار الإيجار فيها مختلفة من حاجات رخيصة جدًا لحاجات متوسطة ومرتفعة، ده غير إنك أكيد روحت إسكندرية تصيف مع أهلك زمان، يعني عودة لزمن العيلة الجميل.
ده غير مطاعم الأكل بقى، يعني مياه وهواء وشمس وأكل مفيش زيه في أي حتة تانية في مصر؛ كبدة الفلاح، وبلبلع بتاع الأكل البحري والمشويات، وقدورة بتاع السمك، وجيلاتي عزة، وألبان سويسرا، ومطاعم تانية كتير.
مكتبة الإسكندرية بتعمل حفلات تحفة في الصيف، وبالذات في شهر يوليو، وهتلاقي حفلات لمطربين أندر جروند وناس كبيرة زيّ عمر خيرت، وفرق مزيكا جامدة، وهتلاقي حفلات رقص لفرق أول مرة تسمع عنها، يعني رحلة ثقافية ثرية.
مرسى مطروح
المدينة موجودة غرب إسكندرية ومشهورة برملتها البيضاء الناعمة والمياه الشفافة وسلاسل الصخور الطبيعية اللي بتديها أجواء طبيعية خلابة، زيّ صخرة ليلى مراد بتاعة فيلم “شاطئ الغرام”.
تم إنشاء المدينة في عصر الأسكندر الأكبر وكان اسمها “أمونيا” نسبة للإله المصري القديم “آمون” اللي كان له معبد هناك، وكان الأسكندر بيزورها كتير.
لو رايح مرسى مطروح، يبقى لازم تروح منطقة عجيبة، ودي خليج صغير جميل بشكل ساحر لدرجة إن أصبح اسمه عجيبة من العجب، وعلشان ماحدش يقدر يوصل لعجيبة غير من خلال طريق تحت الجرف، هتحس إنك طالع مغامرة استكشافية في مكان غامض، بس أول ما توصل لعجيبة هتحس بالعجب فعلًا بسبب المياه الصافية بلون الفيروز والرمل الأبيض الكريستالي والصخور الجملية اللي محاوطة المكان.
عندك كمان حمام كليوباترا وشاطئ عجيبة اللي ممكن تشوف فيه سلاحف البحر وتعوم معاهم في أصفى مياه ممكن تشوفها في مصر، ولإن المدينة هادية جدًا، بطريقة غريبة بجد، هتنبسط فيها جدًا وهتحس بروقان وهتفصل من الشغل والدوشة وكل حاجة.