في مرحلة من الألعاب كانت متمثلة في الكورة الشراب والسبع طوبات والأولة وكيلو بامبية وكيك على العالي، بس لما بدأنا نقول “يا تكنولوجيا يا” ظهرت ألعاب وقتها كان ثورة في مجال الألعاب الحديثة والالكترونية مع بداية ظهور الموبايلات والاتاري وما يسمى بـ”الكومبيوتر”.
الدودة
بتتقال بلعب لعبة “الثعبان” أو بلعب “الدودة”، كانت بتدخلك في ضغط عصبي رهيب لأن كل ما كانت الدودة بتكبر كنت بتدخل في مسؤولية أكبر لتعدية الحواجز من غير ما تخسر الرقم اللي حققته، اللعبة دي ياما دوبت زراير لتليفونات نوكيا من كتر ما كنا بنلعبها عليها، وده لأنها تعتبر بداية الألعاب على الموبايل.
GTA
ياما اتفسحنا مع اللعبة دي لفينا شوارع وركبنا عربيات وحضرنا حفلات وطلعنا على مسارح وقتلنا ناس برضه ودخلنا وخرجنا من مهمات، تجربة مثيرة عشناها مع أبو قميص مشجر كانت بتزود عندنا الإدرينالين من كتر ملاحقات الشرطة.
Crazy Taxi
براءة الطفولة وقتها كانت مخلية ناس تتخيل أنها هتتعلم السواقة من لعبة “كريزي تاكسي” بس في نفس الوقت كانت بتعلمنا قواعد إرضاء الزبون اللي بيركب معاك، والتحكم في انفعالاته وتحاول على قد ما تقدر توصل له لمكانه بأقل خسائر في أرواح الناس.
ازاي تخنق جارك
اسمها الأصلي “Neighbours from Hell” وبالترجمة المصرية الأصيلة بقى اسمها “ازاي تخنق جارك”، طول اللعبة واحنا بندور ازاي ننكد على جارنا بكل الطرق الممكنة، تخريب تلفزيون وكراسي وحمامات، سرقة متعلقات، لعب في المطبخ، اللعبة مناسبة للناس اللي عندها غل أو حس إنتقامي عالي، وده اكتشفتاه لما كبرنا والراجل اللي كنا بنخرب له بيته صعب علينا وقولنا أكيد كل الحوارات اللي في حياتنا بسبب اللي كنا بنعمله فيه.
طرزان
لو ماكونتش اتفرجت على فيلم طرزان فأنت فايتك كتير، وهتعرف ليه لما تيجي تلعب اللعبة الخاصة بالفيلم وتشوف كل الحواجز والتهديدات اللي كان بيواجهها طرزان قدامك وهتفتكر معاها أحداث الفيلم وتفاصيله.