أنا مع نفسي وأنا كبير؟ يمكن تكون شوفتها في أفلام خيالية قبل كده، أنك تعرف شكلك وأنت عندك 60 سنة أو لما تكبر ومش بس كده كمان لأ أنت تقدر تقعد مع نفسك دي وتناقشها في قرارات مش عارف تاخدها وتأخد رأيها فيها باعتبار طبعًا أن النسخة الأكبر منك سنًا هتبقى كلها عقل ورزانة وبعيدة عن العبث اللي أنت بتعمله في حياتك.
وده اللي حصل في معهد ماساتشوستس للتكنولوجيا (MIT)، مجموعة من الباحثين عملوا برنامج اسمه Future You، وده عبارة عن برنامج دردشة آلي بيعتمد على الذكاء الاصطناعي وبيحاكي نسخة من المستخدم مستقبلية عندها 60 سنة، بتشجع الأشخاص على التفكير بجدية في قراراتهم الحالية.
وده عن طريق صورة ملف شخصي قديمة وذكريات افتراضية للمستقبل، بيطلب فيها قصص عن حياته والحكمة أو الخلاصة اللي هيطلع بيها بعد كل السنين دي، وده من خلال إنه بيطرح البرنامج سلسلة من الأسئلة على المستخدمين حول حياتهم الحالية وماضيهم وتطلعاتهم للمستقبل، قبل ما يعمل لهم صورة حلوة كده وهما طالعين معاش في سن الستين، وبتستخدم الإجابات برضه لإنشاء ذكريات افتراضية بتساعد على الإجابة على أي أسئلة في المستقبل، واكتشف بعض المتطوعين في التجربة أن الموضوع آثر عليهم بشكل إيجابي وقلل من نسب التوتر.
تخيل نفسك بقى إنك هتقعد مع نفسك وتناقشها في المصايب اللي عملتها واللي جاية، ده هيبقى ولا كأنه لقاء السحاب المنتظر خصوصًا إن في ناس نفسها من زمان أنها توصل لمستوى الشيخوخة وتكبر وتشوف نفسها وهي تيتة علشان تعبت من صراعات الحياة وتشوف هتبقى تيتة أو جدو عاقلين ولا على ما تفرج.
آخر كلمة: ماتفوتوش قراءة: عمق وكوميكس: مراحل عاصرناها مع بدايات السوشيال ميديا