مفيش حد يقدر يشكك في أهمية وفايدة القراءة بشكل مستمر، وكتير من الناس بيكون عندها تطلعات إنها تبدأ تقرأ أكتر وبتنبهر بالناس اللي القراءة بالنسبة لهم جزء أساسي من يومهم.. ولكن وقت تنفيذ التطلع ده، الموضوع ساعات مابيكنش سهل. فلو انت من الناس دي ونفسك تقرأ أكتر بس مش عارف تبدأ إزاي، هنشارك معاك خطوات بسيطة تساعدك وتشجعك إنك تبدأ تقرأ أكتر وبشكل مستمر.
هيأ لنفسك موود حلو
ده المفروض يكون عمومًا على حاجات كتير مش بس القراءة، فلما تكون عايز تبدأ في حاجة ومش متشجع، لما تحط نفسك في مكان أو “atmosphere” حلو هتلاقي نفسك اتحمست.. فمثلًا لو إحنا في الشتاء ممكن تلبس لبس cozy وتدفى، وتحط جنبك مشروب سخن وتقعد في أكتر حتة بتحبها في البيت وممكن شوية مزيكا هادية كده تشتغل في الخلفية.. ده هيهيأك نفسيًا ويشجعك كبداية.
ابدأ بكتاب بسيط
ساعات وإحنا متحمسين في الأول، بنحس إن إحنا ممكن نقرأ مجلدات من مئات الصفحات أو كتب لغتها صعبة ومعقدة، والحقيقة إن دي مش البداية الصح. علشان ماتبقاش drained وتـ “burn out” بسرعة زيّ ما بيقولوا، لازم تبدأ بكتب أو روايات لغتها بسيطة وماتكنش طويلة، علشان لما تخلصه بسهولة وفي وقت مش طويل، ده هيشجعك إنك تكمل.
جرب أنواع مختلفة من الكتب
ماتحصرش نفسك في نوع واحد مهما كنت بتحبه لإن ده ممكن يخليك تمل بسرعة، فاقرأ كتب مختلفة من رعب لرومانسي، تاريخي، خيال علمي، جريمة أو حتى شعر. ده هيخليك دايمًا متحمس وكمان تكتشف نفسك وميولك في القراءة اللي انت ممكن تكون ماكنتش عارفها كلها ببساطة لإنك مجربتش غير أنواع معينة.
ابعد عنك أي حاجة ممكن تلهيك
في البداية ممكن تواجه بعض الصعوبة في إنك تفضل مركز في اللي انت بتقرأه، علشان كده يفضّل إنك تبعد عنك أي حاجة ممكن تلهيك زيّ إنك تقرأ وانت في ناس حواليك بيتكلموا بصوت عالي، فيفضل إنك في الأول تقعد في مكان هادي، تقفل موبايلك وماتفتحش على التلفزيون جنبك، علشان ماتبقاش مشتت.
خد الموضوع ببساطة
ممكن تستغرب من النقطة دي، ولكن لو فكرت فيها إنها لا تقل أهمية عن أي نقطة تانية اتكلمنا فيها. فأي حد بيحس إنه “مجبر” على حاجة، تلقائيًا بيبدأ يحس إنها تقيلة عليه وإنه مش عايز يعملها. فخد القراية على إنها هواية، حاجة بتفصلك عن العالم وبتخلي موودك أحسن. علشان كده لازم تاخد الموضوع ببساطة وتقرأ وانت في موود حلو ومسترخي، وشوف انت أنهي نوع من أنواع الكتب أريح لك المطبوع ولا الإلكتروني علشان تخلق رابط ذهني بين القراءة والحالة المزاجية الكويسة.
خليك متابع عدد الكتب اللي قرأتها
لما تكون عارف إنت قريت كام كتاب خلال الفترة اللي قررت إنك تبدأ تقرأ فيها، هتذهل من الإنجاز اللي عملته وبالتالي ده هيشجعك إنك تفضل مكمل.
اتناقش مع صحابك عن الكتب اللي عجبتك
لما تبدأ تشارك أفكارك عن الكتب اللي بتقرأها مع صحابك، وتتبادلوا الآراء والـ “recommendations” ده هيحفزك إنك تكمل في القراءة وتوسع أفقك في قراءة حاجات مختلفة أكتر.
خلي القراءة جزء من يومك
القراءة زيها زيّ أي حاجة في الدنيا، بتحتاج تمرين أو “practice” علشان تبدأ تتحسن فيها، فلما تخصص جزء بسيط من وقتك كل يوم علشان تقرأ فيه حتى لو صفحة، هيبقى الموضوع عادة عندك وهتحس إن كل يوم الموضوع بيبقى أسهل عليك.