فكرة شائكة شوية أو مثيرة للجدل؛ إنك تختار لأطفال ظهورهم على السوشيال ميديا من عدمه، مش هنتكلم عن استغلالهم في شيء يضر زيّ الفيديو اللي انتشر لست بتدي بنتها حقن قدام الكاميرا علشان تعلم الناس التمريض، هنتكلم عن نقطة تانية؛ فكرة إنك تختار ظهور الطفل لناس أو جمهور كبير على السوشيال ميديا وأنت متخيل أو مقدر العدد اللي ممكن يتفاعل مع المحتوى، بالسلب أو الإيجاب. وهنا في ظاهرة جديدة حصلت، مش مجرد إن أولاد بلوجر يظهروا معاهم في صور مثلًا، لا دول عاملين أكاونت للبيبي من قبل ما يتولد.
من وهي لسه جنين في بطن أمها، البلوجر حليم وزوجته البلوجر أمل عملوا أكاونت لبنتهم اللي لسه ماجتش الدنيا، وبينزلوا صورها من السونار وهي في بطن أمها، والأكاونت عليه صور للأم وهي حامل، وصور للجنين بأوضاع مختلفة في بطن الأم، والأكاونت عليه أكتر من 100 ألف متابع.
الأب والأم بيكتبوا تعليقات من أكاونت البيبي على صورهم هما، وبيردوا عليها. ناس كتير تداولت صورة للتعليقات دي وبيهزروا إن ده مش طبيعي.
البلوجرز عمومًا هدفهم التفاعل والناس تتابعهم علشان ده مصدر دخلهم والهدف من محتواهم على السوشيال ميديا، وشوفنا نماذج كتير بيعملوا محتوى مع أفراد أسرتهم أو عائلتهم ويعملوا مقالب أو أيًا كان المحتوى الشيق اللي يتعمل بمجموعة من الناس بتربطهم صلة قرابة، بس في الأول والأخر دول أشخاص كبار ومدركين وفي إيدهم الاختيار، الاتجاه الجديد هيكون استغلال أطفال لسه حتى ماتولدوش؟
جدير بالذكر، إن البلوجر أحمد حسن وزوجته زينب واجهوا قبل كده تهمة باستغلالها اقتصاديًا وتعريضها للخطر، بسبب المقالب اللي بيعملوها في بنتهم إيلين واستغلالها علشان الفيديوهات تجيب فلوس ومشاهدات.
الناس رأيهم في الموضوع ده مختلف؛ في ناس شايفة إن ده استغلال للأطفال، وإن الإنسان من حقه هو اللي يقرر يكون مشهور أو لأ، وده بيتطلب في الأول إنه يكون عاقل كفاية وسنه يسمح إنه ياخد القرار ده، وناس شايفة إن عادي ده توثيق لحياة الطفل لما يكبر هيشكر والده ووالدته عليه.
البلوجر كارن وازن علقت على الموضوع ده قبل كده وعن ظهور أولادها معاها في محتواها على إنستجرام بمقتطفات من حياتهم اليومية، لكنها قالت إن الموضوع بالنسبة لها بعيد عن فكرة “الاستغلال” تمامًا، لإن هي المحتوى بتاعها عبارة عن حياتها، لإنها مش براند ولا هي خبيرة موضة، هي محتواها بيدور عن حياتها أو أسلوب الحياة، والصعوبات اللي بتقابلها في الأمومة؛ وبالتالي حياتها مع أولادها لإنهم حاليًا هما الجزء الأكبر من حياتها، اللي هي أساس محتواها. وقالت: “لو ماكنتش هظهر أطفالي كنت هقفل الإنستجرام بتاعي، لإن أطفالي حاليًا هما الجزء الأكبر من حياتي، فلو مش هقوم بإظهارهم هما وزوجي، هكون إيه؟”
المذيعة ريا أبي راشد لحد دلوقتي بتتعمد عدم إظهار وجه بنتها في الصور، وعلقت على الموضوع ده قبل كده وقالت في لقاء مع Olntv: “عندي شروط واضحة كتير، بنتي ما فيها تطلع بوجهها في الصور على السوشيال ميديا، لإنه بفتكر خصوصيتها إلها هي ليش أنا بدي أحرمها من خصوصيتها لإني أنا شخصية عامة وتحت الأضواء؟ لما تكبر إذا هي بدها تظهر ما في مشكلة”.
وبنفس الفكرة والمنطق، أحمد حلمي ومنى زكي اتبعوا نفس الطريقة مع بنتهم لي لي، وكانوا بيرفضوا الظهور الإعلامي لها من وهي صغيرة، لكن لما هي كبرت، هي اختارت الظهور ظهرت معاهم كمان في مهرجانات سينمائية، وبقينا نشوفها في برامج مختلفة.
ممكن الموضوع يكون مختلف شوية بين الفنانين وبين البلوجرز، لإن البلوجرز محتواهم بيعتمد بشكل أساسي على حياتهم، لكن طريقة ظهور الأطفال في المحتوى نفسه كمان أكيد بيفرق، أنتم مع أنهي فريق؟