زيادة الأسعار مشكلة كبيرة بتشغل الشارع المصري في الوقت الحالي. بالإضافة لزيادة الأسعار، ظهرت مشكلة جديدة أخدت مكانها في ردود فعل الشارع المصري من خلال السوشيال ميديا، والمشكلة هي إقرار ضرايب جديدة على ركن العربيات في الشوارع وتحت البيوت، وضريبة على التصوير في شوارع القاهرة وصلت لمبلغ كبير جدًا في اليوم الواحد.
قانون السايس: ضريبة الركنة تحت العقار 300 جنيه
أعلنت الدولة عن بدأ تطبيق ضريبة جديدة على استخدام العربيات للمساحات العامة والشوارع. سَبٍب القانون الجديد موجة غضب كبيرة على السوشيال ميديا بهاشتاج #قانون_السايس.
إيه هو قانون السايس الجديد؟
أقرت مصر قانون السايس رقم 150 لسنة 2020 بخصوص تنظيم ركن العربيات في الشوارع الخاضعة لولاية المحافظات وأجهزة المدن اللي تتبع هيئة المجتمعات العمرانية الجديدة، وصدّق عليه الرئيس المصري عبدالفتاح السيسي في يوليو السنة اللي فاتت.
وفعلًا بدأت بعض المحافظات تنفيذ قانون السايس، واللي بينظم ركن العربيات في الشوارع الرئيسية والجانبية وتحت البيوت.
محافظة الجيزة هي واحدة من المحافظات اللي بدأت تنفيذ القانون، وحطت قايمة بأسعار الرسوم اللي تم اعتمادها بالفعل، وهي 10 جنيه للركن المؤقت للعربيات الملاكي، و20 جنيه للركن المؤقت للعربيات النص نقل، و30 جنيه للركن المؤقت للأتوبيسات الكبيرة و300 جنيه في الشهر للركن للبيات تحت العقار.
موجة الغضب الكبيرة على السوشيال ميديا #قانون_السايس
بعض التعليقات على السوشيال ميديا كانت متضايقة من القرار.
في ناس شايفة إن القانون يعتبر استفزاز للشارع المصري في وقت حرج جدًا، وبيدق ناقوس الخطر.
وناس سألت الريس هنجيب فلوس لكل ده منين.
وناس ماعندهاش مشكلة مع ضريبة الركنة في الشارع، بس هيسيبوا العربية أمانة عند الدولة.
قالت النائبة البرلمانية ميرفت عبد العظيم، إن قانون السايس بيحدد تعريفة لكل عربية علشان تتركن قدام البيوت، وده هينهي حالات البلطجة اللي بيمارسها ناس من الخارجين عن القانون، وبينظم ركنة العربيات من غير “فهلوة” ولا إتاوة وبينهي البلطجة، كمان قالت إن القانون بسيط وبيشتغل على تكوين لجنة في كل محافظة ليها مهمات معينة في قانون السايس.
ضريبة على التصوير في شوارع وجراجات وبنايات وأنفاق القاهرة
طلع قرار من محافظ القاهرة، خالد عبد العال، لتنظيم تصوير الإعلانات والمشاهد السينمائية في شوارع وبنايات وأنفاق وجراجات القاهرة.
والقانون طلع من منطلق محاولة المحافظة تحصيل مستحقاتها من تصوير الإعلانات والمشاهد السينمائية في الممتلكات العامة اللي تخضع لملكية محافظة القاهرة.
وأعلنت المحافظة الرسوم بعد اعتمادها من المحافظ، وهيتم تحصيل رسوم بقدر 15 ألف جنيه فى الساعة مقابل التصوير، وتحصيل رسوم بقيمة 100 ألف جنيه لليوم الكامل مقابل التصوير.
استخراج تصديق التصوير وتحصيل المبالغ هيتم من خلال الإدارة العامة للعلاقات العامة في المحافظة نفسها.
أشرف زكي عن قرار رسوم التصوير في شوارع القاهرة: “مش هندفع حاجة”
اتكلم الدكتور أشرف زكي، نقيب المهن التمثيلية، عن ضريبة التصوير في شوارع القاهرة، في مداخلة تليفونية مع الإعلامي أحمد موسى في برنامج “على مسئوليتي” اللي بيتذاع على قناة صدى البلد، وقال: “بطالب محافظ القاهرة إنه مايضربش صناعة السينما والدراما”، وطلب منه إلغاء القرار أو تخفيض الرسوم ويخليها مبالغ رمزية، وأكد إن ماحدش هيلتزم بدفع رسوم كبيرة “مش هندفع حاجة”، وهيتم اللجوء لأمور تانية ممكن تضر صناعة الفن وشكل الشوارع المصرية.
وكمل “فرض رسوم 100 ألف جنيه عن التصوير في اليوم في شوارع القاهرة ضرب لصناعة الفن والسينما والإعلانات والدراما.” وأكد إن دول تانية هتساعد على التصوير في شوارعها زيّ لبنان والمغرب .
اتكلم زكي عن فخره وسعادته بمداخلة الرئيس عبد الفتاح السيسي مع الإعلامية عزة مصطفى من كم يوم في برنامج صالة التحرير اللي بيتذاع على قناة صدى البلد، واللي أعلن فيها الرئيس دعمه للفن. وطالب نقيب المهن التمثيلية تنفيذ توجيهات الرئيس السيسي بدعم الفن.
مجدي الهواري في فيديو عن قرار ضريبة التصوير في شوارع القاهرة بـ100 ألف جنيه: نجيب منين؟
في الفيديو ده بيسأل مجدي الهواري إذا كان القرار طلع بعد دراسة من أجهزة الدولة والجهات المعنية، بالذات إن بنود الميزانية مش هتسمح بزيادة أي مبالغ مالية، وقال إن القرار هيسبب مشكلتين.
المشكلة الأولى فنية وبتؤثر على الصورة اللي هتتقدم للجمهور وهتخلي الإنتاج يعتمد على المشاهد الداخلية بس، والمشكلة التانية هتؤثر على ميزانية إنتاج الأعمال الفنية.
وقال: “مفيش رفاهية في بنود الميزانية علشان ندفع المبالغ دي، والقرار هيخلي الأعمال الصغيرة تطلع بجودة سيئة واللي هيؤثر بالسلب على العمل الفني، مش هقدر أنتج وأطلع الصورة اللي الرَيس بيتكلم عنها”.
“الميزانية لوحدها هتكلف مليون جنيه علشان أصور في شارع مصر، والقرار صادر في الوقت اللي الريس بيدعم الفن! المنتجين ومديرين الإنتاج أكبر ناس هتتأثر بالقرار”، ووضح إن القرار هيسبب خسارة مصر للدولارات بسبب المعاناة اللي هتقف في وش أي فريق عمل أجنبي علشان يصور في القاهرة.
واتكلم عن المغرب وقراراتها اللي خصصت مدينة إنتاج فيها كل التسهيلات للتصوير مجانًا، ووقفت جنب الدعايا وتحسين السياحة هناك. وختم كلامه: “المفروض نساهم ونزق السياحة والاقتصاد، في فلوس كتير بتروح علينا، ومشكلة كبيرة إننا ندفع الرسوم دي في شوارع مصر علشان نخرج بعمل فني كويس.”
أمير رمسيس بيطالب محافظ القاهرة يرجع عن قرار زيادة رسوم التصوير بالشوارع
قال رمسيس في رسالة وجهها لمحافظ القاهرة ونشرها من خلال حسابه الرسمي على فيسبوك: “السيد الفاضل محافظ القاهرة ..جزيل الشكر على إنك توليت منصبك حديثا وليس منذ زمن.. فربما لو توليته في الماضي على الأرجح لم نكن لنرى افلاما مثل “حياة أو موت” لكمال الشيخ.. “أحلام هند وكاميليا” محمد خان.. “البحث عن سيد مرزوق” داود عبد السيد و”القاهرة منورة بأهلها” يوسف شاهين.. وكافة اعمال جيل الواقعية الجديدة في السينما المصرية التي حاربت تيارا سائدا وصنعت قصائد في حب مدينة القاهرة.
وكمل كلامه : “على الاقل صار لدينا تراث سينمائي نترحم عليه قبل مجيء سيادتكم إلى المنصب.. لو لم يتم سحب قرار رسوم التصوير الخارجي سيتذكر تاريخ السينما المصرية للأبد دور هذا القرار الغير مدروس في قتل صناعة كانت يوما رائدة في المنطقة وبداية مرحلة ان نرى شوارع بيروت ودبي والدار البيضاء بديلا لشوارع القاهرة.”
وختم كلامه: “شكرا لأنكم لم تطعنون صناعة السينما في مقتل إلا بعد أن صار لدينا تراث نترحم عليه.”