“روق صحصح فوق لينا ده اليوم ده بتاعنا لوحدينا” رحلات وسفريات بتستناها من السنة للسنة، وبعيدًا عن الخناقات اللي دايرة على الصيف والمصيف، في شخصيات مميزة بتبقى موجودة في كل سفرية وكل واحد له دوره ومهمته اللي ماقدرش نستغنى عنهم.
صاحب البروجرام
بيبقى مخطط كل حاجة من قبل ما تطلعوا الرحلة بشهر، هتروحوا فين وهتقعدوا قد إيه حتى الفسح والخروجات محددها هتبقى فين، ولما تسافروا بالسلامة بيبقى مسؤول برضه عن ميعاد صحيانكو، ويمكن تلاقيه ماشي بورقة وقلم في إيده طول الوقت وبيعتبر البوجرام اللي حاطه ده عيل من عياله ومينفعش حد يتخطاه أو يعديه.
المشرف
مشرف الرحلات ماكوناش بنشوفه غير في الرحلات المدرسية بس الظاهر إن فيه ناس كبرت وبقت تحب تتقمص الدور ده في حياتها العادية، صفاته بتتلخص في أنه بيبقى عامل زي الأب الروحي للسفرية، بيطمن على كل شخص وعلى كل حاجة أنها تمام وفي مكانها والأولاد مبسوطين والرحلة ماشية عال العال كما مخطط لها.
النايم
وده تعب الدنيا وحياته كلها بتبدأ تظهر عليه أول ما تبدأ الرحلة، بيفضل طول الطريق نايم بحجة إنه مطبق، وبيفضل طول السفرية نايم بحجة أنه مرهق من الطريق، وقاعد على السرير لا حول له ولا قوة وبيبقى مالوش وجود في الرحلة بس بيبقى معاهم بقلبه.
المتأخر
وهنا بقصد بيها بنسبة 90% البنات، أي نزولة أو خروجة في السفرية بتبقى متأخرة مع إنها صاحية من قبلها بساعات، بس سحبة الإيلاينر والأي شادو ولفة الحجاب والغرق في منتجات العناية بالبشرة وأمور بتظهر مرة واحدة بتخلي موضوع النزولة أو الخروجة في السفر من المستحيلات.
فاشونيستا
فاشونيستا الرحلة ودي في الغالب بتبقى ناقلة الدولاب بتاعها من البيت وجايباه في شنطة السفر، وبتبدأ في عمل عرض أزياء مستمر على البحر طول السفر، لزوم السوشيال ميديا والاستوريز.
مطرب الرحلة
“حازم صوته حلو أوي يا أنسة غادة” كلمة مطرب الرحلات أول حاجة بتيجي في بالك هو مشهد فيلم حب البنات لما أستاذ حازم غنى للأستاذة غادة “نسيني وأنا جنبك وأنسى الدنيا واخطفني من الأحلام” واتكسفت وقتها وجريت، في الرحلات بقى هتلاقي نموذج حازم اللي بيضفي هو والجيتار على الناس بهجة.
آخر كلمة: ماتفوتوش قراءة: بيوت الرمل والفريسكا: حاجات بنحبها في الساحل الطيب