في واحدة من النماذج المشرفة والإيجابية اللي تستحق إننا نتكلم عنها ونسلط الضوء عليها، سوسن أحمد طفلة مصرية عايشة في أمريكا، لقبوها بالطفلة المعجزة في أمريكا.. إيه السبب؟
ليه لقبوها بالطفلة المعجزة؟
من أول ما اتولدت وأهلها توقعوا إنها هتبقى طفلة مختلفة، وده فعلًا اللي حصل معاها وهي لسه في سن التسع سنين، لإنها قدرت إنها تاخد شهادة الثانوية وتتخرج من المدرسة في الوقت ده! قدرت إنها تاخد شهادة مهمة زيّ دي وهي في السن ده. وده بعد ما اجتازت اختبار PERT وهو اختبار تحديد المستوى بتستخدمه فلوريدا لتحديد إذا كان الطالب جاهز إنه يلتحق بالكلية ولا لأ.
ومش بس كده، ده بعد تلات سنين من حصولها على شهادة الثانوية، اتخرجت سوسن من جامعة بروارد في ولاية فلوريدا الأمريكية وبكده تعتبر أصغر خريجة في تاريخ الكلية وفقًا لصحيفة ديلي ميل بسن 12 سنة! وده السبب الأساسي اللي خلى الناس تطلق عليها اللقب ده، وتخصصها اللي حصلت منه على الشهادة هو العلوم البيلوجية واتخرجت بمعدل 4 على 4 يعني 100%! يعني مش بس اتخرجت منها في سن صغير لأ دي كمان كانت من الأوائل!
وطموح سوسن ماوقفش لحد كده! لأ دي قررت إنها تكمل في مجال الكيميا والأحياء وبرمجة الكمبيوتر، وفي حديث صحفي لها قالت إن والدتها اللي اكتشفت ذكائها ونبوغها في سن صغير وهي اللي حرصت إنها تشجعها وتساعدها إنها تكتشف علوم جديدة ومجالات كتيرة أكبر من سنها.
سوسن ماكانتش هتعرف توصل للي هي فيه ده من غير ما يكونوا أهلها هم الداعمين الأساسيين لها، أهل يقدروا حجم الموهبة والذكاء اللي عند بنتهم، ويستغلوه استغلال صح ويطوروه. نتمنى كل الأهالي تبقى كده!