دايمًا أوقات الأزمات بتظهر أحلى ما في المصريين وبتبين معدنهم الحقيقي الثمين. ومن وقت تفشي فيروس الكورونا في مصر، ابتدت المبادرات المختلفة تظهر من الأفراد والجماعات في كل حتة في البلد علشان يساعدوا غيرهم في الفترة الصعبة دي علينا كلنا، وفعلاً كتير من المبادرات دي أثبتت نجاحها وتأثيرها زي مبادرة توفير الوجبات الصحية لمرضى الكورونا المعزولين في البيت، وشوفنا ابتكارات جديدة كان صعب إنها تبان في الأوقات العادية زي الروبوت اللي أخترعه شاب مصري للمساعدة في تخطي الأزمة.
وواحدة من أجدد المبادرات اللي ظهرت الفترة دي، هي حملة تنظيف أطلقتها فتاة من الأقصر اسمها زينب كعابيش، وده بعد ما لاحظت إن الناس بترمي الكمامات والجوانتيات الطبية في الشارع بعد استخدامها، فقررت تنزل تنضف الشارع بنفسها وتتخلص من الكمامات دي بطريقة آمنة علشان تقلل من ضررها على البيئة، وتمنع احتمالية إعادة تجميعها واستخدامها من جديد.
.jpg){kind=link}
قبل ما زينب تنزل الشارع، أعلنت على صفحتها الشخصية على الفيسبوك عن مبادرتها، وقالت إنها قررت تنزل بالكمامة، والجوانتي، وكيس القمامة، ومقص الشارع علشان تجمع الكمامات من الأرض وتتخلص منها، ودعت أصدقائها إنهم يشاركوها حملتها.
وبالفعل قدرت زينب في يوم واحد بس إنها تجمع أكتر من 200 كمامة كانت مرمية على الأرض بالقرب من كورنيش الأقصر، وقالت لليوم السابع إنها لقت دعم كبير من المارة في الشارع، وأصحاب المحلات اللي رحبوا بمبادرتها وساعدوها.