بعد ما تعاطف طارق كيوان، وهو صاحب ورشة لخراطة المعادن في دمياط، مع كلب ضال فقد أحد أطرافه، قرر استغلال مهارته اليدوية ومعداته في صناعة طرف صناعي للكلب يرجع حركته لطبيعتها.
أخذ كيوان مقاسات أطراف الكلب، واشتغل على تصنيع ساق صناعية ليه لمدة سبع أيام متتالية، وبالفعل نجح في صناعتها من مادة ارتالون البلاستيكية، وقدر الكلب يمشي بشكل طبيعي من جديد.
وبعد نجاح التجربة الأولى لعمل الأطراف الصناعية للكلاب، ابتدت الطلبات تتوالى على الخراط صاحب الـ 52 سنة، وقرر إنه يوسع نشاطاته، ويعلن على صفحات وجروبات الفيسبوك عن خدماته المجانية للحيوانات اللي فقدت أطرافها على مستوى الجمهورية.
كيوان مكنش مُحب للحيوانات الأليفة ولا عمره فكر في تربيتهم، بس لما شاف وجع الكلب الضال في الشارع قرر تخفيف آلامه عنه، وفرحة الكلب بالساق الجديدة شجعته إنه يساعد غيره من الحيوانات، وبالفعل جاله أكثر من 1000 حيوان ما بين كلاب وقطط محتاجين أطراف جديدة.
الخراط المصري وورشته موجودين في محافظة دمياط بالدلتا، وهو بيساعد الحيوانات في المحافظات التانية عن طريق الطلب من الناس اللي بيبلغوا عن الحالات المحتاجة مساعدة بإعطائه مقاسات أطرافهم، وهو بيصنعها وبيوصلها لبيوتهم بدون أي مقابل.