رغم صغر سنه، أوس عودة بقى أصغر مدرس للغة الإشارة، وهو عنده 5 سنين بس، رغم إنه ماعندوش مشكلة في السمع أو النطق، لكنه اتعلم لغة الإشارة من والده علشان يقدر يتواصل مع جده وجدته وهما من الصم والبكم، بطريقة جميلة، بيحاول أوس عودة إنه ينشر ثقافة تعلم أساسيات لغة الإشارة بين الشباب على السوشيال ميديا، علشان تبقى حاجة طبيعية نقدر نتعامل بيها في يومنا ونتواصل بيها مع الأشخاص اللي عندهم مشاكل في السمع أو الكلام، وندمجهم أكتر مع المجتمع من غير ما يحسوا إن صعب عليهم التواصل مع الناس.
أوس اتعلم لغة الإشارة من والده، وبعدها قرر ينتج فيديوهات إرشادية ويعرضها على قناة خاصة بيه على اليوتيوب، والد أوس واحد من المترجمين المعروفين في الأردن للغة الإشارة، وقال إن أوس متحمس جدًا للي بيعمله وإنه بيحب لغة الإشارة، وإنه بيفكره بطفولته، لكن الفرق بين أوس ووالده، إن والده كانت اللغة الأم بالنسباله هي لغة الإشارة وبيتعلم معاها اللغة المنطوقة، لكن أوس تعتبر لغته الأم هي اللغة المنطوقة وبيكتسب لغة الإشارة بحب وشغف منه.
أوس عودة بيقدم فيديوهاته وهو بيتمنى نشر فكرة تعلم على الأقل أساسيات لغة الإشارة، وعلى قناته على اليوتيوب، بيعلمها للأطفال وكمان بيتابعه عدد من الكبار وبيتعلموا من فيديوهاته، والموضوع ابتدى بفيديوهات بيشوفها أصدقائه على صفحته، لحد ما نشر الفكرة والفيديوهات علشان يستفيد بيها اكبر عدد من الناس.