في مواضيع الواحد وهو بيكتب عنها أو بيقرأها، بيحس بطاقة إيجابية وشعور بالأمان لما يشوف كم الخير اللي موجود واللي بيكون بمثابة نجم لامع في سماء ضلمة، بيدينا شعاع نور في الأوقات الصعبة. والموضوع ده بكل تأكيد هيفرح قلبك وإنت بتقرأه، زي ما فرح قلبي وأنا بكتبه..
“الأكل زي الفن.. لغة عالمية بتقرب الناس وتقدر اختلافاتهم” ده اللي قالتوا دودل فاكتوري وهي بتعلن عن تعاونها مع زيست لدعم مؤسسة الصم وضعاف السمع. وشاركهم المبادرة دي الفنانة يسرا اللوزي والفنان هاني عادل لنشر الوعي عن إمكانيات الأطفال دول وأهمية إشراكهم في المجتمع.
بتهدف دودل فاكتوري لمساعدة أطفال ضعاف السمع في إنهم يقدروا يكملوا رحلتهم التعليمية، فبتساعد في مصاريف وحدة تعليم الصم الكنيسة الأسقفية،عن طريق إطلاق مجموعة مطبخ جديدة ومرايل مبهجة، اللي تصميمها عليه رسومات لأطفال وحدة الصم. فعن طريق شرائك للمجموعة دي، بتكون بتتكفل بمصاريف طفل علشان يقدر يكمل تعليمة .. هتكون بتبهج بيتك بطقم مطبخ جديد، واتسوقت لهدف سامي في نفس الوقت.
نشرت يسرا مقطع فيديو علي حسابها بالإنستجرام بيجمعها بولد وبنت بيعانوا من ضعف السمع. وخلال الفيديو بنشوف إزاي بيحصل حوار وتفاعل مع بعض من خلال استخدام لغة الإشارة، فبيهزروا وبيضحكوا، وكمان بيطبخوا سوا. الطبخة بتبقي عُبارة عن فطائر البان كيك الملونة، بس بدل الألوان الصناعية بيستخدموا مكونات طبيعية زي الكركم والبقدونس بهدف عمل أكلة صحية. وإتكلمت يسرا كمان عن أهمية تعلم لغة الإشارة حتي للناس العادية، علشان نقدر كلنا نتواصل مع بعض.
البان كيك بيكون ملون ككناية عن البهجة والأمل اللي بتكمل الشكل والروح الإيحابية اللي بيحاولوا يوصلوها للناس والأطفال كمان. وكانت دايمًا بتظهر يسرا اهتمامها للتوعية عن النوع ده من القضايا لأن ابنتها الكبري دليلة بتعاني برضه من ضعف السمع، فقدرت يسرا إنها مش يس تساعد بنتها ولكن بتساعد مئات الأطفال اللي ممكن يكون معندهمش اللي يساعدهم ويدافع عن قدراتهم.
هاني عادل كمان كان من اللي شاركوا في حملة التوعية دي، اللي اتعلم من الأطفال إزاي يقدر يقول اسمه بلغة الإشارة، وبنشوف فجو مليان بالمرح والبهجة الخطوات اللي بيعملوها علشان يطبخوا البان كيك الصحية والملونة. وخلال الفيديو بينصح هاني الناس إنها تشتري مجموعة دودل فاكتوري للمطبخ علشان يساعدوا فتأمين مصاريف دراسة الأطفال دول.
لو عايز تعمل فرق بجد وتشارك في الحملة النبيلة دي، تقدر تدخل علي موقع دودل فاكتوري وتشتري مجموعة الطبخ بتاعتهم.
المبادرات اللي زي دي ومشاركات الناس فيها، هي اللي هتمهد لطريق أجمل وأسهل علي أطفال ضعاف السمع.