أعلنت وزارة التخطيط والتنمية الاقتصادية عن الأماكن اللي متواجد فيها عربيات المراكز التكنولوجية المتنقلة “سجل مدني” واللي بتقدم خدماتها لسكان مدينة العلمين الجديدة والناس الموجودين في نطاق الساحل الشمالي، وأشارت الدكتورة هالة السعيد وزيرة التخطيط والتنمية إن هيبقى متواجد 3 عربيات متنقلة خلال شهر أغسطس وسبتمبر.
واحدة منهم بالتنسيق مع وزارة العدل لتقديم خدمات التوثيق، وعربيتين بالتنسيق مع قطاع الأحوال المدنية في وزارة الداخلية علشان يقدموا خدمات ليها علاقة بإصدار بطاقات الرقم القومي، وشهادات الميلاد والوفاة وقسيمة الجواز والطلاق.
والوزارة قالت إنها هتعلن كل أسبوع عن أماكن تواجد السيارات دي، واللي هيكونوا موجودين الأسبوع ده قدام فندق الماسة في العلمين، والعربية المسئولة عن خدمات التوثيق بالذات هتكون موجودة يوم الأربع والخميس قدام مقر جهاز القرى السياحية (مارينا 4).
وبترجع فكرة مشروع المراكز التكنولوجية المتنقلة في إنها محاولة لتقليل الزحمة والتكدس اللي بيبقوا موجودين قدام أي مركز للخدمات الحكومية، وفي نفس الوقت هيساعد في إنجاز المعاملات الحكومية، وده وفقًا لتوجه الدولة للتحول الرقمي واللي بيتوافق مع رؤية مصر لسنة 2030.
وكان من قبل خدمة السجل المدني المتنقل، لقينا خدمة التظلم الإلكتروني على مخالفات المرور من وأنت في بيتك عن طريق الموقع بتاع الوزارة، وبرضه في نفس الفترة ظهر خدمة توصيل اللقاح لكبار السن في البيت وده عن طريق إنك بتسجل بيانات تابعة لوزارة الصحة. وكلها خطوات مهمة وبتحقق أهداف التنمية المستدامة اللي بتسعى ليها الدولة.