سارة عبد الرحمن وإطلالتها المختلفة بهدف الحفاظ على البيئة..

سارة عبد الرحمن فنانة مصرية بتحب تشجع الحفاظ على البيئة وكمان عدم صرف فلوس كتير في مظاهر ملهاش لازمة، وابتدت سارة بنفسها وعبرت عن فكرها من خلال نشره في احتفالات ومهرجانات كبيرة ودولية زي مهرجان الجونة السينمائي ومهرجان القاهرة السينمائي الدولي، عن طريق إنها بتشجع لبس فساتين من براندات أسعارها بسيطة، أو إنها كمان تظهر بستايلات مختلفة تخطف أنظار الناس زي لبسها لفستان مصنوع من البلاستيك، في مهرجان كبير زي مهرجان الجونة، تعالوا نشوف إزاي سارة بتشجع على ده من خلال إطلالاتها.

إطلالة من البلاستيك

ودي كانت أول مرة سارة تعبر عن فكرها من خلال لبسها، وكانت في مهرجان الجونة في دورته التانية سنة 2018، علشان تنشر توعية بأهمية إعادة تدوير المواد اللي تحلَلها مضر للبيئة فنقدر نستخدمها تاني بشكل مختلف ونساعد في الحفاظ على البيئة، وقالت “أول مرة أعرف إحساس اني أعبر عن نفسي و أفكاري من خلال اللبس و بطريقة علنية و صريحة زي كده بالرغم من الشك اللي كان جوايا ان ماحدش هايهتم بأي حاجة لها علاقة بالبيئة” وكمان أشارت للي ساهموا في نجاح الفكرة وهما المؤسسين لشركة “اپ فيوز” لإعادة تدوير البلاستيك و تحويله لشنط واللي تحمسوا للفكرة و نفذوها بكل سرعة وإتقان، وكمان وجهت الشكر لسيدات منشية ناصر العاملات في شركة ، اللي بيتم توفير دخل ثابت ليهم يحميهم من شغلهم في فصل القمامة، اللي بتسبب أمراض كتير، وشكرت ازميرالدا مصممة الأزياء اللي عرفت تطلع التصميم الذكي ده من بلاستيك معاد تدويره.

فستان من وكالة البلح

في حفل ختام مهرجان القاهرة السينمائي في 2018، اختارت سارة إنها تظهر بإطلالة حكايتها مختلفة، بفستان مستعمل من وكالة البلح سعره 370 جنيه، وقالت إنها مبسوطة إنها بتثبت لنفسها وللكل إنها ممكن تلاقي إطلالة مناسبة لحدث مهم بسعر قليل من غير ما تضطر تلجأ لفساتين غالية من براند أو مصمم أزياء عالمي، وبتشجع إعادة إستعمال وتدوير اللبس في العموم علشان نوفر إستعمال خامات اتصنعت في ظروف غير آدمية خصوصا في وقت ما أثار الجدل أخبار عن براندات عالمية بتستغل العمالة من بلاد فقيرة وبتشغلهم في ظروف غير آدمية وبأجور رمزية.

إطلالة الجونة 2020

أما في مهرجان الجونة في دورته الرابعة السنادي، ظهرت سارة بفستان بسيط ومختلف، سعره 650 جنيه، لأنها بتشجع اللبس الحلو اللي بأسعار مناسبة ومش خرافية زي المعتاد من براندات ومصممين أزياء عالميين.

وبنتمني إن فنانين أكتر يدعموا الفكر دة للمحافظة على البيئة وللحد من استهلاك كتير مالوش لزمة نقدر نقلله ببدائل بسيطة وبنفس قدر جمال الحاجات الغالية.

آخر كلمة: بندعم نفكير سارة المختلف للمحافظة على البيئة.