“التاسعة يا أهلي”.. 9 أرقام تاريخية للأهلي وموسيماني بعد التأهل لنهائي أفريقيا

"التاسعة يا أهلي".. 9 أرقام تاريخية للأهلي وموسيماني بعد التأهل لنهائي أفريقيا !!

بواسطة محمود سامي.

مباراة الأهلي والوداد المغربي في نصف نهائي دوري أبطال أفريقيا اللي كانت يوم الجمعة اللي فاتت مكنتش مجرد مباراة تأهل لنهائي البطولة، لكن كانت مباراة لتحقيق أرقام قياسية كتيرة للنادي ومدربه الجنوب أفريقي بيتسو موسيماني.. 9 أرقام تاريخية حققها المارد الأحمر بعد التأهل تعالوا نعرفهم مع بعض.

ملك النهائي

تأهل الأهلي لنهائي البطولة بمختلف مسمياتها للمرة الـ 13 في تاريخه، وكسب 8 نهائيات سنين (1982، و1987، و2001، و2005، و2006، و2008، و2012، و2013) كأكتر فريق يحقق اللقب بفارق 3 بطولات عن أقرب منافسينه (الزمالك، ومازيمبي الكونغولي، 5 بطولات لكل فريق منهم).

لا يُقهر في مصر

الأهلي مخسرش أو اتعادل على أرضه من شهر مايو سنة 2018 لما اتعادل مع فريق الترجي التونسي في دور المجموعات (0 – 0)، وهو رقم مفيش فريق حققه من بداية إقرار نظام البطولة بالشكل الحالي سنة 1997.

رقم قياسي في الأهداف

الأهلي سجل 34 هدفًا لحد دلوقتي في النسخة دي وممكن يزود الرقم ده في النهائي، وبكده يكون كسر الرقم السابق “31 هدفا” اللي كان متسجل باسمه بالتساوي مع إنيمبا النيجيري.

لا يخسر في نصف النهائي

الأهلي مخسرش في دور نصف النهائي لدوري الأبطال من سنة 2010، وقدر يكسب نصف نهائي نسخ 2012، و2013، و2017، و2018، والنسخة الحالية 2020.

أول مكسب بره مصر

عن تويتر

فوز الأهلي على الوداد في مباراة الذهاب اللي كانت يوم السبت 17 أكتوبر كان الفوز الأول له بره مصر في الدور نصف النهائي من البطولة على مدار تاريخه.

المرمى في أمان

هدفان فقط دخلوا شباك الأهلي في أخر 12 مباراة أفريقية على ملعبه، بواقع هدف في مباراة الوداد الأخيرة، وآخر في مواجهة الهلال السوداني بدور مجموعات النسخة الحالية.

موسيماني لأول مرة

لأول مرة يفوز بيتسو موسيماني على فريق الوداد في مباراتي الذهاب والعودة في مسيرته التدريبية.

فك العُقدة

موسيماني قدر يفك عُقدة الوداد، ولأول مرة يقصي الفريق المغربي من الأدوار الإقصائية، بعد لما اتقابلوا في ربع نهائي سنة 2017، وقدر صن داونز يكسب في الذهاب 1 – 0، لكنه خسر في العودة بنتيجة 4 – 2، وخرج ساعتها من البطولة.

والمرة التانية كانت في نصف نهائي سنة 2019، ووقتها خسر موسيماني في الذهاب 2 – 1، واتعادلوا في العودة 0 – 0، ليخرج صن داونز من البطولة على إيد الوداد للمرة الثانية.

أكبر فوز

حقق موسيماني أكبر انتصار ليه على الوداد في ماتش الجمعة اللي فاتت (3 – 1).

آخر كلمة: قولولنا توقعاتكم في التعليقات.. مين اللي هيأخد البطولة؟

تعليقات
Loading...