حاجة جديدة لقيناها منتشرة دلوقتي، الـ picnic رغم إنها من زمان بس كانت بشكل تقليدي مش زيّ ده، بتخلينا نجدد طاقتنا بالقعدة في الشمس والهوا وسط حبايبنا، ومعانا أكل بنحبه وسناكس وكمان ممكن تاخد معاك أدوات رسم وتمارس هوايتك في الرسم وسط الطبيعة دي، الـ picnic زيّ ما بنشوفه في الأفلام على الملاية الكاروهات الأبيض في أحمر (أساسية طبعًا لا يجوز الـ picnic من غيرها عشان الناس ماتاكلش وشنا)، على النجيلة الخضراء تحت أشعة الشمس الدافئة في الوقت ده من السنة، والخروجة في مكان مفتوح، طيب كل ده نجهز له ازاي وإيه الأماكن اللي ممكن نروحها مناسبة للخروجة دي؟ تعالوا نشوف.
زيّ ما قلنا، انت هتتفق مع أصحابك أو قرايبك، وتحضروا أكل خفيف وسريع بتحبوه، وسلة فواكه من بتوع الأفلام الأجنبي، وشوية تسالي ومقرمشات كده، وتتفقوا على يوم تقضوه في وسط الجناين والطبيعة، وجبنا لك أماكن كتير في مناطق مختلفة وبأسعار كمان مختلفة علشان تناسب الكل.
الأزهر بارك
في وسط القاهرة مش مكان بعيد، وسعر تذكرة الدخول قليل، ومكان معظم الناس حافظينه، ده لو أنت مش بتحب تغامر وتجرب أماكن جديدة أو بعيدة وبتحب تخليك في أماكن تعرفها، تقدر تعمل picnic في الأزهر بارك، وهي مكان واسع هتعرف فيه تاخد مكان أنت وأصحاب تقعدوا فيه براحتكوا ترغوا وتاكلوا وتستمتعوا بالطبيعة بأقل الإمكانيات.
فاميلي بارك
على طريق القاهرة السويس، مدخل الرحاب 2، حديقة على مساحة 80 فدان تابعة للقوات المسلحة المصرية، وفيها مجموعة من المتاحف الصغيرة كمان، ومطعم على البحيرة وطفطف، وطبعا في هناك أنشطة للأطفال ممكن تتعمل، لكن بالنسبة للمواصلات، هتكون صعبة خصوصًا لو معاك عيلتك، هتكون أسهل بكتير لو روحت بعربيتك.
جنينة الأسماك
بس المرة دي مش “الحاج عبد الموجود موجود؟” ولا “6 كيلو سمك وجمبري”، جنينة الأسماك من أقدم الجناين في مصر ومشهورة بإنها مكان للعشاق ومكان رومانسي، لكنها من أكتر الحدائق المميزة بطبيعة خاصة، لو قررت تروح تعمل picnic هناك هتتبسط جدًا وسط طبيعة من نوع خاص هناك، وكمان بيميزها مكانها في الزمالك على النيل.
جولف الكمباوند
من الآخر، لو أنت ساكن في كمباوند، أو حد من شلتك أو قرايبك، روحوا اعملوا الـ picnic في حتت الجولف والجناين اللي بتبقى جوا الكمباوند، من غير فلوس خالص، وهتتبسطوا بالجناين والشمس زيّ أي مكان تاني وكمان بأقل تكلفة.
سفاري بارك
سفاري بارك أو حديقة الجيزة، جنب محور أحمد عرابي الجديد، جنينة كبيرة تقدر تاخد شلتك وتحضيراتكم كلها وتستمتعوا بأحلى picnic وبأسعار دخول بسيطة.
حديقة الفنون
في المنيل، شارع عبد العزيز آل سعود، حديقة هادية ومش زحمة، وأسعارها على قد الإيد كمان، على النيل، وكمان فيها مراكب نيلية تقدروا بعد ما تخلصوا أكل وشرب ورغي، تاخدوا فسحة في النيل بمركب من هناك.