عمر أبو داود وزوجته أسماء، زوجين من مدينة طنطا، قرروا يبقوا أول زوجين يسافروا للمملكة العربية السعودية بالموتوسيكل في رحلة استمرت لمدة 10 أيام “رايح جاي” علشان يأدوا مناسك العمرة ويشاركوا في كسوة الكعبة.
عمر وأسماء كانت رحلتهم ضمن فريق متكامل مكون من 22 شخص وقائد دراجة نارية من أعضاء الاتحاد المصري للدراجات النارية، وجهزوا للرحلة دي من تلات شهور وأخدوا الموافقات اللازمة علشان يقدروا يطلعوا ضمن فريق. وفعلًا وقت وصولهم الأراضي السعودية، استقبلوهم بالورود.
وفي حوار صحفي للزوجين في اليوم السابع قالوا: ‘إن رحلة السفر من طنطا للسعودية أخدت 48 ساعة متصلة، وإن كان في فريق دعم متكامل كان بيرافقهم، وإن التجربة دي كان متخطط لها وقضوا 6 أيام في الأراضي السعودية والإمارات.
وعن كواليس ما قبل الرحلة قالت أسماء:” أنا كنت بحب الموتوسيكلات من زمان، لكن ماكنتش بركبها خالص، لكن لما اتعرفت على زوجي عمر كان هو بيحب ركوب الموتوسيكلات جدًا، واشترينا واحد وكنت مبسوطة وأنا بركبه معاه.. بعدها جه اقتراح المشاركة في رالي التحدي العربي، واتحمسنا جدًا خصوصًا إن هيبقى عندنا فرصه نعمل عمرة”
وتابعت كلامها “اشتركنا في الرالي، وكانت رحلة ممتعة جدًا، وقدرنا إننا نعمل عمرة، لكن ماشاركناش في خياطة كسوة الكعبة، لإننا ماكناش مع الجروب اللي راح مدينة جدة، لكن اللي راحوا شاركوا فعلًا في خياطة كسوة الكعبة، أخدوا هدايا تذكارية، وهي خيوط ذهبية من الكسوة، ودي كانت من ألطف الحاجات اللي حصلت”.
وعلى سيرة الأرقام القياسية، شوفنا من فترة المصري علي عبده اللي نجح في تحقيق رقم قياسي جديد والأول من نوعه في قيادة الدراجات الكهربائية “موتوسيكل”. في خلال 24 ساعة قدر إنه يقطع مسافة 919 كيلومتر بدلًا من 809، ودي كانت المسافة المطلوبة منه قطعها خلال الـ24 ساعة لتسجيل الرقم القياسي في موسوعة جينيس للأرقام القياسي.
وكان قبله كريم الدمياطي اللي قدر إنه يسافر 100 كيلو متر بالعجلة، وتارا عماد اللي سافرت من القاهرة لأسوان في 11 يوم بالعجلة، وكان أكثرهم جدلًا شاب سوهاجي يسافر على ظهر “حمار” من القاهرة لأسوان علشان يتعرف على ثقافات مختلفة في كل بلد وكل قرية.