سواء حسيت بيه الساعة 3 بالليل، أو صحيت لقيت الناس كلها بتتكلم عنه، خبر زلزال بقوة متوسطة حسوا بيه سكان مصر وخمس دول تانية انتشر في كل حتة، والزلزال أثار فزع اللي حسوا بيه وقتها لإن قوته ملحوظة واستمر حوالي 15 ثانية. الناس صحيت مفزوعة وكله بيسأل “حد حس بالزلزال؟” واتصدر تريند تويتر. الزلزال مركزه في قبرص وكان بقوة 6.6 ريختر وده مش قليل، واتأثر بيه سكان مصر وفلسطين والأراضي المحتلة، وتركيا واليونان والمملكة المتحدة.
في مصر، مش متعودين يكون عندنا زلازل بشكل متكرر في وقت قصير زيّ ما حصل في الشهور القليلة اللي فاتت، وكمان إنها بتبقى زلازل يحس بيها السكان، مش زيّ ما كنا بنعرف من الأخبار إن حصل زلزال لكن بقوة مش كبيرة وماحدش حس بيه. دلوقتي الموضوع اتكرر أكتر من مرة في وقت قصير، وده أثار القلق والتساؤلات، هل ده طبيعي؟ هل له علاقة ببركان لا بالما؟ هل هيكون في خطورة متوقعة بكوارث طبيعية في مصر؟
في أواخر 2021، حصل أكتر من زلزال في مصر في وقت قصير، وده خلى الناس تسأل. وقتها صرح الدكتور عباس شراقي أستاذ الجيولوجيا في جامعة القاهرة، عن كيفية تأثر مصر بثورة بركان لا بالما في إسبانيا، وقال إن بركان لا بالما تكوّن من 1.8 مليون سنة، وهو ضخم وقمته ترتفع 2500 متر فوق سطح البحر، وفيه مئات الفتحات البركانية اللي بتنشط على فترات زمنية مختلفة، والحمم البركانية الخاصة به بتتحرك وبيخرج منه أبخرة وغازات بتوصل لشمال أفريقيا، وغطت أوروبا بالكامل، وصرح كمان بوجود ارتباط فعلًا بين الزلازل اللي بتحصل وبين بركان لا بالما، لكن تأثر مصر أقل خطر من تأثر أوروبا بيه.