بدأت مصر فعليًا في تطبيق قانون الشهر العقاري الجديد لتسجيل ملكية العقارات، واللي المفروض إنه يقدم تيسيرات واسعة في مجال نقل الملكية في سوق العقارات في مصر. تعالوا نعرف أكتر عنه وعن التسهيلات والإجراءات اللي هيقدمها وازاي هتوفر وقت وجهد وفلوس وتقتل الروتين .
بخصوص سداد الضريبة
المفروض هيتم فصل سداد ضريبة التصرفات العقارية عن إجراءات التسجيل ورسومها؛ احنا قبل كده لما كنا بنقدم طلب تسجيل كان الشهر العقاري بيطالب إننا نجيب ما يفيد إن البائع سدد الضريبة دي واللي هي 2.5%، بس دلوقتي تقدر تروح من غير ما يبقى معاك ما يُثبت إن البائع سددها.
بخصوص تسلسل الملكية
كان في شوية تعقيدات قديمة بخصوص تقديم تسلسل للملكية وأنت رايح تسجل في الشهر العقاري، بس دلوقتي أنت تقدر تسجل من غير ما يبقى معاك تسلسل الملكية بس ده هيبقى وفقًا لشروط وحالات معينة، زيّ إن الشخص يبقى معاه سند صحيح “عقد وصحة توقيع” أو عقد بيع ابتدائي أو وصل كهرباء أو مياه وواخد 5 سنين في حيازة العقار، ويبقى حسن النية “مايكونش عليه جرايم أو مستولي على العقار بلطجة وده هيتثبت من التحريات وشهادة الشهود”.
والحالة التانية اللي تقدر تسجل من خلالها من غير ما تجيب تسلسل للملكية هي إن يبقى في حكم نهائي من المحكمة بثبوت الملكية، وده كان عكس اللي بيحصل قبل كده، ووقتها كان بيبقى لو معاك حكم كان بيحل محل توقيع البايع بس بيبقى في شروط تانية وأوراق تانية مطالب بها، بس دلوقتي مع تعديل القانون، حكم المحكمة هيبقى كافي بالنسبة لك.
الحالة التالتة إن يبقى في وضع يد على العقار لأكتر من 15 سنة بقصد التملك، بس ده بعد ما الشهر العقاري بيتحقق من ده، بس الآلية لسه مش واضحة بالنسبة لنا ازاي هيتحقق بالظبط.
وكل التسهيلات دي هتوفر على المواطن وقت وجهد كبير كانوا بيضيعوا، خصوصًا إن بسبب التعقيدات دي كنت هتلاقي إن أكتر من 90% من العقارات الموجودة ماكنتش بتنفذ ده، و 7% بس اللي كانت مسجلة والمواطنين كانوا بيلجأوا لإبرام عقود عرفية بديلة عن التسجيل.
ومن ضمن المميزات برضه إن حيازة العقار هيبقى لمدة خمس سنين مع مستند يدل على الإقامة في العقار، ونفس الكلام بالنسبة لحالات الوراثة لو أنت وارث العقار ده لازم يبقى معاك ورق بيثبت الملكية لمدة ماتزيدش عن 15 سنة.
وفي لقاء مع لميس الحديدي، أتكلم جمال ياقوت، رئيس مصلحة الشهر العقاري، عن القانون ووميزاته وقال إن الإجراءات الجديدة دي هتعمل نقلة واسعة وهتحول كل عقارات مصر من عقارات غير مسلجة لمسجلة، وأتكلم عن مرحلة بتسبق التسجيل العقاري، وهي مرحلة “رفع المساحات” ودي المفروض تاخد 14 يوم ضمن ال37 يوم المحددين للتسجيل، ده غير إن إجراءات التسجيل هتبقى إلكترونية وهيبقى في نموذج مخصص لكل حالة بعينها وده اللي أتكلمنا عنه فوق.
وأتكلم عن التسهيلات الخاصة بفصل سداد ضريبة التصرفات العقارية بالتحديد، ولو ماتعرفش يعني إيه تصرفات عقارية فهي عبارة عن”مبالغ مالية لعملية نقل الملكية بيدفعها البائع”، وقال جمال ياقوت إن فصلها عن إجراءات التسجيل هيسهل كتير، وهيفتح المجال قدام المشتري إنه يتوجه لتسجيل الملكية الخاصة بشكل مباشر من غير ما يتسأل عن أداء الضريبة من البائع.
وكمل كلامه وقال إن أقصى رسم لتسجيل العقارات والشقق بالشهر العقاري دلوقتي بقى 3900 جنيه، بالإضافة ل100 جنيه سعر نموذج التسجيل، يعني هيبقى المجمل 4000 جنيه بس رسوم تسجيل العقارات حسب قانون الشهر العقاري الجديد، وده هيرجع للمساحات الخاصة بالعقارات سواء بالمدن أو الريف والقرى.
البيروقراطية والربط بالضريبة العقارية كان بيمثل تعقيدات إجرائية ونسبة كبيرة من الثروة العقارية كانت مهدرة بسببه، مستنيين نشوف تعديل القانون الجديد بعد ما يتم تطبيقه لفترة ازاي يسهل على حياتنا ويوفر وقت ومجهود كان ببيروح في مشاوير كتير.