رسميًا: الكويت تستأنف الرحلات الجوية مع مصر

بعد فترة طويلة من إيقاف الطيران المباشر بين مصر والكويت، وحظر الكويت رحلات الطيران التجاري بينها وبين أكتر من 30 دولة، من بينها مصر، ولبنان، والعراق، وإيران، والهند.. صرح المتحدث الرسمي باسم الإدارة العامة للطيران المدني الكويتية إن الرحلات الجوية من الكويت لمصر هيتم استئنافها تاني. وقال المتحدث الرسمي سعد العتيبي إن الخطوة دي اتاخدت علشان تسهل إجراءات السفر للمصريين اللي عايزين يرجعوا لبلدهم مصر عن طريق الخطوط المباشرة.. لإن الجالية المصرية في الكويت عددها 700 ألف نسمة تقريبًا، وده بيعتبر عدد كبير جدًا واللي أكيد هيكونوا حابيين يقضوا الأجازات مع عائلتهم.

طبعًا هتعاود حركة السفر بشرط الالتزام بالإجراءات الاحترازية لفيروس كورونا، منعًا من انتشار الوباء وزيادة أعداد المصابين بالمرض.. والقرار ده ليه تأثير إيجابي على البلدين بالتأكيد، منهم تحويل الاستفادة الكاملة من الطيران، والحجر المؤسسي الصحي إلى الجهات الكويتية والمصرية، بدل من استفادة دول وسيطة من رحلات الترانزيت، وطبعًا هيستفيد الطلبة الكويتيين اللي بيدرسوا في الجامعات المصرية من القرار ده، وهيقدروا يروحوا ويرجعوا بشكل مباشر، وكمان هيفتح المجال للراغبين في السياحة بمصر.

ومن وقت توقف الرحلات المباشرة بين البلدين، لجأ كتير من المسافرين إلى رحلات الترانزيت من خلال بلد تالتة، وده طبعًا رفع تكاليف الرحلات، واضطر كتير من المسافرين إنهم يأجلوا سفرهم لحد ما الرحلات ترجع تاني بين البلدين.

آخر كلمة: ماتفوتوش قراءة: “رسميًا.. السفر من غير تأشيرة بين الإمارات وإسرائيل“.

تعليقات
Loading...