ربط هتاف “ميسي وينه” بهتاف مصري قديم من جماهير الأهلي المصري

أشهر هتاف عربي في المونديال لحد دلوقتي، قالوه الجمهور السعودي بعد فوزهم التاريخي على الأرجنتين في أول مبارياتهم في كأس العالم 2022 “وينه ميسي”.

الجماهير السعودية بتتساءل من بعد المباراة في كل مكان، وانتشرت فيديوهات لهم كمان في مداخلات لقنوات تلفزيونية، وهتاف “ميسي وينه كسرنا عينه” غرق السوشيال ميديا، أيوة هو ميسي أسطورة كرة القدم، في مونديال 2022 السعوديين مش شايفينه.

قصة الهتاف المصري

في ناس بقى ربطت بين الهتاف ده وبين هتاف مصري اتقال من حوالي 80 سنة في ماتش بين الأهلي والزمالك، بقصة قديمة كده، اتكلم فيها المؤرخ المصري محمد الأحمدي، مؤلف كتاب “صفحات من تاريخ الأهلي” وقال إن الهتاف ده مقتبس من جماهير الأهلي لما قالوه في ماتش مع غريمه التقليدي الزمالك، في ماتش من حوالي 85 سنة.

الهتاف المصري قصته بدأت لما الزمالك خسر مرتين من الأهلي في 1937 مباراتين الذهاب والعودة، ووقتها الزمالك كان داخل الماتشات دي بلاعب جديد كانوا متوقعين إنه يقلب الأمور رأسًا على عقب ومتوسمين فيه الخير والفوز على إيده، اللاعب اسمه “عبده”.

وقبل الماتش، جمهور الزمالك هتف “عبده جالكوا خبوا عيالكوا” لكن بعد الهزيمة من الأهلي بخمس أهداف مقابل لا شيء، جمهور الأهلي قلب الترابيزة وخلّى الهتاف “عبده فينه كسرنا عينه”.

بصمة مونديال 2022

لحد دلوقتي المنتخبات العربية لها بصمة كبيرة في الأسابيع الأولى من كأس العالم، هتاف “ميسي وينه” كان الأكتر شهرة، لكن مش الوحيد.

كأس العالم 2022 هيفضل في الذاكرة خصوصًا بالنسبة للعرب، غير التنظيم والإقامة على أرض عربية، اللعبة نفسها بيحصل فيها معجزات الناس بتقول عنها شبه أحلام العصرية، من فوز السعودية على واحد من أكبر وأهم المنتخبات العالمية اللي طول عمره بينافس على كأس العالم نفسه، مرورًا بالأداء المشرف للمنتخبات العربية حتى الآن، اللعب بشجاعة والهجوم وعدم الاعتماد على خطط الدفاع بس.

مدرجات المنتخب التونسي محجوزة بالكامل في كل مباريات دوري المجموعات، يعني الجماهير من دلوقتي على أتم الاستعداد يشجعوا بكل قلبهم، ولكل المنتخبات العربية الموجودة جماهيرهم جاهزين بالهتافات الحماسية والأغاني اللي بتهز المدرجات، واللي بتخلّي اللعبة أحلى.

هتافات لفلسطين

فلسطين كانت حاضرة في عقول الجماهير العرب في المونديال، وشوفنا هتافات وأغاني حماسية من جماهير منتخبات عربية مختلفة زي المشجعين التونسيين، استغلوا البطولة العربية علشان يوصلوا القضية الفلسطينية للعالم بصورة حضارية.

هتافات الجماهير التونسية لفلسطين خلال مباريات كأس العالم في قطر. 🇵🇸🇹🇳

Posted by Fida Ahmad Khanfar on Tuesday, November 22, 2022

آخر كلمة: ماتفوتوش قراءة: ملخص أهم لحظات من افتتاح كأس العالم في قطر

تعليقات
Loading...