أعلنت الإدارة العامة للمرور التابعة لوزارة الداخلية عن تركيب رادار ألماني جديد لكشف مخالفات المرور، وده في إطار تطوير الطرق والحد من خطر الحوادث، وبتشتغل أجهزة الدولة النهارده باستخدام آخر التطورات التكنولوجية علشان تواجه الجريمة والحوادث على الطرق.
يقدر الرادار الألماني الجديد يٌرصد مخالفات المرور؛ زيّ مخالفة تجاوز السرعات، ومخالفة الخروج من الحارة المرورية المخصصة للسائق، ويقدر كمان يقرأ اللوحة ويكتشف انتهاء صلاحيتها.
وبيعمل صورة مسح ضوئي عالي الجودة بالليزر من داخل المركبة، وبالتالي يرصد مخالفات من داخل السيارة؛ زيّ مخالفة عدم ربط حزام الأمان، ومخالفة استخدام الهاتف المحمول في أثناء القيادة، ومخالفة ركوب الأطفال الصغيرة في المقاعد الأمامية.
الرادار الجديد بيوصل مداه لـ 300 متر، وبيلتقط صورة بجودة عالية سواء في الليل أو النهار، ويقدر كمان يقيس سرعة السيارة حتى بعد ما تعدي من الرادار، ويقدر يلقط أكتر من 100 سيارة في نفس الوقت، وبيربط بين بيانات السيارة ومعلومات السائق المتسجلة في قاعدة البيانات.
وبالتالي يقدر الرادار يعمل كشف جنائي عن السواق، ويحدد إذا كان محكوم عليه جنائيًا أو مطلوب في أي قضايا جنائية، وبكده هيساعد في زيادة معدلات ضبط الهاربين من القانون، وهيزود درجة التعاون والتنسيق بين الإدارات المرورية والأمنية.
الرادار الجديد مش موجود على الطرق السريعة بس، ولكن موجود كمان جوه المدن وبيغطي 80 في المية من مساحة الجمهورية.
السرعات المقررة على الطرق فى قانون المرور لمنع مخالفات الرادار
علشان تتجنب أي مخالفات بسبب الرادار الجديد، بنقدم لك حدود السرعات أثناء القيادة على الطرق، واللي وضعتها الإدارة العامة للمرور.
السرعات المقررة على الطرق داخل المدينة
حددت إدارة المرور سرعة سيارات المقطورات وأنصاف المقطورات بـ 40 كيلومتر في الساعة، وبـ 60 كيلومتر في الساعة لباقي أنواع السيارات. أما السرعات المقررة على الطرق في المناطق الصناعية والسياحية والسكنية فاتحددت بـ 40 كيلومتر لكل أنواع السيارات.
السرعات المقررة على الطرق السريعة أو الرئيسية اللي بتربط المحافظات
اتحددت سرعة سيارات النقل بـ 70 كيلومتر في الساعة، وسرعة سيارات نقل الركاب بـ 80 كيلومتر في الساعة، أما باقي أنواع السيارات فاتحددت سرعتها بـ 90 كيلومتر في الساعة.
السرعات المقررة على الطرق الصحراوية في قانون المرور
اتحددت سرعة سيارات القاطرة للمقطورات بـ 70 كيلومتر في الساعة، وسرعة سيارات النقل بـ 80 كيلومتر في الساعة، وسرعة سيارات نقل الركاب بـ 90 كيلومتر في الساعة، أما باقي أنواع السيارات فاتحددت سرعتها بـ 100 كيلومتر في الساعة.