طلع قرار من رئاسة جامعة بني سويف بفصل الأستاذ حسين يوسف، أستاذ مساعد ورئيس قسم التاريخ. والفصل عن العمل هيكون لمدة تلات شهور أو لحد ما التحقيق ينتهي، وده بعد ما الأستاذ حسين يوسف ضرب طالبة بالقلم وخلع نقابها قدام زمايلها في لجنة الإمتحان.
وعلقت الطالبة داليا في سنة تانية بكلية الأداب قسم الفلسفة إن الدكتور اعتدى عليها بالضرب خلال امتحان مادة مصادر البحث العلمي… وقالت إن الدكتور ورئيس القسم كان بيمر على اللجان وطلب يكشف عن شخصية داليا -الطالبة المنقبة- داليا ادت ليه جواز السفر الخاص بيها والدكتورة المرافقة رفعت النقاب واتأكدت من شخصية داليا وتم السماح ليها بدخول لجنة الامتحان وأداء الامتحان بشكل عادي جدًا.
وهي داليا خارجة قررت إنها المفروض تعتذر من الدكتور لإنه شد معاهم ولسه بتقول له أنا أسفة وماكملتش كلامها، راح قالها اطلعي برة وغوري في داهية وهعملك محضر.
داليا قالت للدكتور إنها ماتكلمتش وماقالتش حاجة، راح قالها أنا هعملك محضر ومش هسيبك، فهي بتسأله في إيه، راح ضربها بالقلم وقلعها النقاب قدام زمايلها والمراقبين وكل الناس دي شهود على اللي حصل.
طبعًا ضرب طالبة أمر مرفوض تمامًا سواء من أستاذ جامعي أو من أي حد غيره. الجامعة المفروض تكون مكان نستكشف فيه ذاتنا وشغفنا ونتعلم فيه البحث العلمي والنقاش الهادف مش نتضرب فيه بالقلم ونتهان.
وإن أستاذ جامعي يشد طالبة من نقابها ويقلعهولها قدام كل زمايلها من الطلبة، ده شيء مهين جدًا وماينفعش يعدي بسهولة.
محتاجين نضغط على رئاسة جامعة بني سويف علشان الموضوع ده مايعديش بسهولة خاصة إن إساءات أساتذة الجامعات للطلبة في مصر منتشرة جدًا وبتحصل كل يوم، ولازم ناخد موقف منها ونتكلم أكتر عن اللي بيحصل مع الطلبة في الجامعات.
كمان لازم يكون في رقابة على أساتذة الجامعة ويكون في حساب على تصرفاتهم لإن عدم وجود الرقابة وامتلاك السلطة المطلقة داخل الجامعة بيؤدي لإساءة استخدام السلطة دي وبيخلي الطلبة والأساتذة يقعوا في دوامة الإساءات المكررة اللي احنا عايشينها دي.