في يوم 1 يونيو سنة ١٩٣٨، ظهرت شخصية سوبرمان لأول مرة في مجلة أكشن كوميكس، وبشكل تدريجي قصصه حولته لأشهر بطل خارق في العالم لعقود طويلة، وهي المكانة اللي حافظ عليها لحد دلوقتي وإن ظهر له منافسين تانيين.
بمناسبة ذكرى ميلاد سوبرمان البطل المؤسس لعالم الأبطال الخارقين بشكله الكارتوني، واللي ساعد في انتشار مجلات الكوميكس، هنتكلم هنا عن أبطال خارقين ليهم علاقة بمصر والعالم العربي، وهنتكلم برضه عن الأبطال الخارقين اللي انتشروا عبر مجلات كوميكس ورسوم عربية.
سوبرمان العربي.. البطل الجبار
مجلة سوبرمان هي مجلة لبنانية ظهرت عن مركز الصباغ في لبنان وكانت بتنزل كل أسبوع، العدد الأول منها ظهر في فبراير سنة ١٩٦٣ وكانت بتترسم وتتألف من فنانين عرب وفيها قصص ومسابقات وملاحق ومساهمات من القراء، كان شعارها “سوبرمان البطل الجبار”.
التسلية والبطولة مع أبطال فلاش
في التسعينيات كانت في مصر والعالم العربي طفرة في مجلات الكوميكس، بعد ظهور رسام ومؤلفين موهوبين زيّ خالد الصفتي اللي متعنا على مدار سنين طويلة برسوماته وقصصه العبقرية في مجلة فلاش. وحققت فلاش نجاح كبير وكانت طريفة وخفيفة وجذابة ومسلية ومفيدة، كمان أبطالها كانوا بشكل أو آخر أبطالنا؛ يعني بعضنا حب ميدو وشاف فيه بطل، وبعضنا حس بمعاناة المواطن المطحون وشافه بطل بيواجه الحياة بفقره الشديد ومعاناته، وبعضنا شاف علام بدمه الخفيف بطل زينا بيحب يقول قصص دمها خفيف بعضها أو معظمها مش حقيقي عشان يبقى “خارق”.
الصفتي قدر يخلق عشرات الشخصيات ودمجها مع بعض في قصص شيقة جدًا فيها معلومات ثقافية مفيدة ونقد ساخر للواقع، وهو الاتجاه اللي كان بعيد عن الخيال شوية، يعني لا بطل بيطير ولا بينقذ ناس ومدن من الهلاك، بس بيحاولوا ينقذوا واقعهم اليومي زينا كلنا بشكل بسيط.
تان تان في الزمالك
لأكتر من عشر سنين كانت مجلة “تان تان” واحدة من الأعمال المحببة للعالم العربي.. تان تان المحقق الذكي اللي بيطارد الأشرار وبيواجه مخططاتهم. سنة ١٩٧١ ظهرت المجلة في الوطن العربي، وكانت بتطبع في مصر، وكانت بتعتمد على الترجمة لقصص ورسومات مؤلف ورسام تان تان الفرنسي هرجيه، اللي مات سنة ١٩٨١ ولما مات وقف كل حاجة.
النسخة العربية لقصص تان تان المصورة كان فيها أبواب أحيانًا زي “أضف إلى معلوماتك” وفقرات عن العلوم والفنون، وكان للمجلة جمهور كبير في سوريا بيبعتوا مراسلات تتنشر في أبواب معينة، وهي المراسلات اللي كان بيستقبلها مكتب “تان تان” في مصر بالمركز العربي للإعلام في الزمالك.
“مجلتي”.. أبطال بيتكلموا عراقي
“مجلتي” هي مجلة أطفال عراقية بتصدر من دار ثقافة الأطفال التابعة لوزارة الثقافة العراقية، وأول عدد ليها كان في ١٩٦٩، المجلة كانت بتهتم بالقصص المصورة لأبطال عراقيين بيتكلموا اللهجة العامية العراقية المحلية، كانت بتهتم بالشعر والعلم والتكنولوجيا ومساهمات القراء، وكان الرسامين من أشهر الرسامين العراقيين وأكترهم موهبة.
أسامة.. بطل رغم الأزمات في سوريا
مجلة بتطلع كل أسبوعين في سوريا ومستمرة لحد دلوقتي من وقت ما ظهرت سنة ١٩٦٩، ومهتمة بثقافة الطفل عن طريق بطلها أسامة وقصصة الممتعة اللي خلته بطل في عيون الأطفال السوريين، الجميل أنها ما أتأثرتش بالأزمة في سوريا ولسه موجودة.
سمير وباسل “الكشاف الشجاع”
مجلة سمير ظهرت سنة ١٩٦٦ عن دار الهلال في مصر، واتميزت بالأبطال اللي فيهم سمات وملامح عربية بتتسق مع توجهات المرحلة دي من تاريخ مصر والعالم العربي. أتميزت بالقصص المصورة محلية الإنتاج زيّ سمير وتهته وباسل “الكشاف الشجاع” وبوبي وبسبس والأسطى فالح.
مجلة سمير تُعتبر هي رائدة فن المجلات المصورة في العالم العربى حتى لو سبقها إصدارات تانية.
ماجد البطل الخليجي
مجلة ماجد ظهرت لأول مرة في فبراير من عام ١٩٧٩ عن شركة أبو ظبي للإعلام، ولسه مستمرة لحد دلوقتي وفيها أبطال كتير أبرزهم ماجد وشخصية “كسلان جدًا”، ده غير زيكو وزيكي وزعتر وفضولي وأبطال تانية كتير.
علاء الدين.. تان تان المصري
مجلة علاء الدين هي مجلة مصرية أسبوعية بتصدر عن مؤسسة الأهرام، وصدر العدد الأول منها في يوم 1 يوليو ١٩٩٤. الشخصية الرئيسية هي شخصية علاء الدين اللي بيحقق في جرايم أو أحداث مثيرة بشكل قريب من قصص تان تان، إلا إنها بتتميز بمصريتها الخالصة وشخصية علاء الدين مثال لبطل مصري ذكي وشجاع، وهو من تأليف محمد المنسي قنديل، ورسوم وليد نايف.
الرجل العناب.. بطل “الكوميكس” الخارق
في رمضان ٢٠١٣، أتعرض مسلسل الرجل العناب للثلاثي أحمد فهمي، هشام ماجد، وشيكو، والمسلسل وإن كان ما نجحش النجاح المتوقع في نفس السنة، إلا إن حصل اكتشاف مفاجيء للمسلسل اللي قدم شخصية البطل الخارق بشكله الأجنبي بشكل هزلي ومضحك في ثوب مصري ووسط أحداث مصرية.
الرجل العناب لحد دلوقتي هو بطل دائم على الكوميكس، ونقدر نقول بطل حقيقي لكتير بس بطل بيسخر من الواقع اليومي لكل واحد فينا.