إمبارح كان المفروض يكون حفل الميت جالا Met Gala السنوي اللي بيحضره كل سنة مجموعة كبيرة من مشاهير الموضة والفنون، وبينظمه معهد الأزياء التابع لمتحف الميتروبوليتان للفنون فى نيويورك. الحفل اتلغى السنة دي بسبب الإجراءات الاحترازية ضد فيروس الكورونا، وعلشان تعوض إدارة المتحف غيابه، قررت تقديم جولة افتراضية جوا المعرض اللي بيكون مُصاحب للحفل، واللي مسمينه السنة دي “حول الوقت.. الموضة والمدة”، وموضوعه تطور الأزياء فى الفترة بين 1870 و2020.
الميت جالا بيعتبر واحد من أهم الأحداث عالمياً في مجال الموضة لدرجة إنهم بيطلقوا عليه أوسكار الموضة، وعلشان تقدر تحضره في نسخته الجديدة السنة الجاية في مجموعة من الأسئلة اللي لازم تعرف إجابتها علشان تكون مستعد كفاية.
إيه هو الميت جالا؟
الميت جالا إسمه الرسمي أزياء معهد جالا أو ميت بول، وزي ما قولنا هو واحد من أهم الأحداث الدولية في مجال الموضة وده لأنه بيمثل افتتاح معرض الأزياء السنوي لمعهد آنا وينتور للأزياء، وهو كمان حفل جمع التبرعات السنوي لصالح المعهد في متحف المتروبوليتان للفنون في مدينة نيويورك.
كل سنة بيكون في موضوع مُختلف للمعرض المُصاحب للحفل، وعلى الأساس ده بيختار الضيوف الأزياء اللي هيلبسوها بحيث تناسب الموضوع ده.
إزاي تجيب التذكرة؟
نظرياً أي حد يقدر يحضر الميت جالا، بس على أرض الواقع في حاجات كتيرة ممكن تقف في طريقك. زي مثلاً إن سعر التذكرة أكتر من 30 ألف دولار، وسعر الترابيزة بيتراوح بين 200 ألف ل 300 ألف دولار. وحتى لو معاك المبلغ ده ممكن متقدرش تحضر بردو لأن أغلب التذاكر بتشتريها بيوت الأزياء العالمية، ولازم تتحايل على آنا وينتور المسئولة عن الحدث من سنة 1999 ورئيسة تحرير مجلة فوغ الأمريكية علشان تحطك على قائمة الإنتظار.
تلبس إيه في الحفل؟
لو افترضنا إنك قدرت تجيب التذكرة وأخدت الدعوة للحفل، وقدرت تدفع فلوس الطيارة لنيويورك وكمان الإقامة في مكان فخم هناك، إنت لسة في عندك لبس محتاج تجيبه لليوم المهم ده. اللبس لازم يكون ماشي مع موضوع الحفل ويكون قيم كمان علشان تقدر تدخل، وده نموزج للأزياء الفخمة اللي بتتلبس في يوم زي ده:
كل لؤلؤة من اللي متزين بيهم فستان بيونسيه تكلفتها 8 ألاف دولار، ومانكير عارضة الأزياء جيجي حديد كانت تكلفته لوحده ألفين دولار. وده مش بالنسبة للستات بس فإنت عندك بدل وأزياء الرجال من بيوت الأزياء العالمية أسعارها فلكية، وإنت كده محتاج تعمل ميزانية ضخمة للبس لوحده والإكسسوارات بتاعته.
وفي الآخر إزاي تعمل دخول ملحمي؟
انت ممكن تعمل زي ليدي جاجا وتغير لبسك أربع مرات على السجادة الحمراء في عرض يخطف عيون كل الناس، أو اسهل ممكن تستخدم ليموزين فخم يوصلك لحد باب الحدث. الليموزين ده ممكن يكلفك أكتر من 600 دولار في الساعة وانت هتحتاجه في حدود ست ساعات فإحسبها إنت بقى وودع فلوسك.