في قاعات المحاكم وخصوصًا محاكم الأسرة بنشوف العجب واللي يشيب الرأس دعاوي خلع ودعاوي طلاق وقواضي وفي منها أسباب صادقة وحقيقية ونابعة من يأس وأمل الطرف التاني بإن العلاقة وصلت لطريق مسدود، وفي أسباب بعض الناس بتصنفها بإنها أسباب غريبة أو أسباب مش مألوفة ومش بنسمع عنها كتير. وده اللي حصل مع سيدة مصرية قدمت دعوى خلع على جوزها بسبب إنه مابياكلش بالشوكة والسكينة.
السبب الأساسي اللي قدمت الدعوى علشانه “استحالة العشرة مع جوزها بسبب اختلاف مستوى المعيشة والفروق الاجتماعية بينهم”. بس وقت ما علمت حوار صحفي مع بوابة الأهرام شرحت وقالت الأسباب دي:
الزوجة كانت مهندسة مدنية واتجوزت من مهندس، واتعرفوا على بعض في الجامعة وجمعت بينهم قصة حب كبيرة وعلى حد تعبيرها “رغم الفروق الاجتماعية اللي بينهم” بس اتجوزته على أمل إنه يتغير بعد الجواز. بس ماكانتش تعرف إن الطبع هيغلب التطبع. وبعد ما اتجوزوا أكتر من 10 سنين وبقى عندهم أطفال. قالت إنه بياكل بطريقة مثيرة للاشمئزاز وإنها حاولت معاه كتير إنه يستخدم الشوكة والسكينة بس كان بيرفض وبيقولها إنه كان متربي على كده.
وكملت كلامها: بإنه رغم إن مرتبهم بيتخطى الـ10 آلاف جنيه وإنهم بيسكنوا في كومباوند.. بس جوزها “للأسف” بيلبس لبس رخيص ومش ماركات! ومش عايز يغير عربيته لواحدة جديدة أحدث وماشي بموبايل عادي.
