خناقة على الهوا: ساويرس: شاكر مش عارف يعمل فلوس زي بتوع المهرجانات، وشاكر: مايشرفنيش ساويرس يسمعني
خناقة على الهوا بين رجل الأعمال نجيب ساويرس ونقيب الموسيقيين هاني شاكر في برنامج الحكاية بتاع الإعلامي عمرو أديب، ودخل على الخط الناقد الموسيقي حلمي بكر وطارق الشناوي، واختلفت الأراء بخصوص قرارات النقابة.
بدأ الموضوع بتويت للمهندس نجيب ساويرس بتقول: “اول مرة اشوف نقيب للمغنيين فخور جدا بمنع الغناء … الجمهور اللي يقرر يسمع مين و ميسمعش مين.. مش النقيب !”. وفي مداخلة مع عمرو أديب في برنامج “الحكاية” قال ساويرس إن النقيب هاني شاكر مش دوره يكون رقيب على أذواقنا، ووصف قرارت شاكر بالنفسنة، وقال إنه مش أصلًا مش بيحب غناء شاكر، وإنه لو القانون بيديله الحق يمنع حد من الغنا فده قانون غلط، وقال إن الجمهور هو الوحيد اللي من حقه يختار يسمع مين ومايسمعش مين، ووضح إن الجمهور تعب من الناس اللي عامله نفسها ربنا وعماله تفرض رقابة على ذوق الناس، وأكد إن قطع أرزاق الناس ربنا مش بيسامج فيه، وإنه هو لو مش عارف يعمل فلوس زي الناس اللي بيمنعها فدي مشكلته.
بعدها دخل على الخط النقاد الموسيقيين حلمي بكر وطارق الشناوي علشان يعلقوا على على قرارات النقابة الأخيرة بمنع مطربي المهرجانات والرابرز المصريين.
وقال الناقد الموسيقيي طارق الشناوي إن النقابة مشوشة ومش عارفة تاخد قرار وإنها عماله تاخد قرارات متناقضة وبتسمح لمطربيين شعبيين ورابرز معينين بالغناء وبتمنع أخرين من غير أي أساس واضح.
ووضح إن لو في مطرب غنى كلام أبيح فالنيابة الجنائية من حقها تحبسه لكن النقابة ملهاش حق تمنع الأغاني، ووضح إن أم كلثوم غنت الأطلال في نفس الوقت اللي عدوية غنا فيه السح الدح امبو وإن ذوق الجمهور المصري ماتغيرش والناس فضلت تسمع الأطلال في نفس الوقت اللي بتسمع فيه أغاني عدوية وأكد إن الدنيا ماتهدتش، في إشارة إلى إن الرقابة اللي بتفرضها النقابة على أذواق الجمهور باطلة والأسباب اللي بتستخدمها علشان تمارس الرقابة دي وهمية وملهاش أساس.
دخل على الخط الناقد الموسيقي حلمي بكر وأكد إن الكلام اللي بيتقال في الأغاني الشعبي والراب المصري مؤخرًا سيئ جدًا وإن النقابة بتحاول تنقذ الذوق العام وأشار للأغنية الأخيرة لأغنية فرعون ووصفها بإنها سيئة جدًا وإنها بتأثر على تصرفات الجمهور وإختياراته الموسيقية. رد عليه الشناوي وقال إن النيابة الجنائية بتعاقب الناس اللي بتستخدم ألفاظ خارجة وإننا ماينفعش نلغي لون معين من الموسيقى وإن الناس بتختار تسمع إيه والجمهور حر.
دخل المطرب هاني شاكر نقيب المهن الموسيقية، بمكالمة تليفونية مع برنامج الحكاية وشن حملة نقد على رجال الأعمال المهندس نجيب ساويرس.
وقال هاني شاكر، :”مايشرفنيش إن ساويرس يسمعني خالص، واللي بيسمع مغني المهرجانات والنوعية دي مش عايزة يسمعني أصلًا”.
وتابع هاني شاكر نقيب المهن الموسيقية، إنه مش بيفتري على حد والقائمة اللي منعتها النقابة من الغناء مافيهاش أعضاء في النقابة وبالذات حسن شاكوش وحمو بيكا، ووضح إن حسن شاكوش خرج على المسرح وقال كلام لا يليق وخارج تماما.
وتابع هاني شاكر نقيب المهن الموسيقية، إن دور نقابة المهن الموسيقية هو منع المغنيين من الغناء بالاشتراك مع المصنفات مش بس دور اجتماعي وحل مشاكل أعضاء النقابة وتقديم الدعم المادي لهم، لافتا إلى إن حسن شاكوش ارتكب فعل فاضح في واحدة من الحفلات بتاعته على المسرح.