مع دخول فصل الشتاء بنحتاج نشرب حاجات سخنة أو مغذية تدفينا، علشان كده جبنالكم وصفات لمشروبات عربية مشهورة، وسهلة التحضير، ومفيدة، ولذيذة كمان، زي السحلب المعروف في مصر عن طريق الدولة العثمانية، وعصير عوار القلب السعودي، والجبنة السودانية.
السحلب
هنحتاج معلقتين كبار من مسحوق السحلب، وكوبايتين لبن، و4 معالق سكر، وقرفة، ومكسرات حسب الرغبة.
هنقلب اللبن مع مسحوق السحلب والسكر على نار هادية ونقلب لغاية ما الخليط يتقل شوية، ونزود عليه المكسرات، ونصبه في أطباق، ونزينه بالمكسرات والقرفة.
شاي المرمرية
هنحتاج أوراق المرمرية، ومياه، وسكر أو عسل للتحلية، وشاي أحمر.
هندلق كوباية مياه مغلية على أوراق المرمرية مع الشاي، ونغطيها، ونسيبها تتنقع لمدة عشر دقايق، بعد كده نصفي المياه من أوراق المرمرية والشاي ونصبه في كوبايات ونزود عسل أو سكر للتحلية.
المرمرية مفيدة في تقوية الأعصاب، وتخفيض مستوى السكر في الدم، وتقوية جهاز المناعة.
الجَبَنَة
الجَبَنَة هي مشروب من بلد السودان، وقبائل حلايب وشاتين، والنوبة، وهي عبارة عن مشروب قهوة.
هنحتاج 4 معالق كبيرة من البن، ومعلقة حبهان مطحون كبيرة، ومعلقة زنجبيل مطحون كبيرة، وسكر للتحلية على حسب الرغبة، وكوبيتين مياه.
هنغلي المياه، ونزود عليها الحبهان والزنجبيل، ونسيبهم يغلوا لمدة عشر دقايق، ونزود عليهم البن لغاية مايغلوا، ونجيب فنجان نحط فيه سكر لو عايزين ونصب فوقيه القهوة.
عوار القلب
عوار القلب يعني وجع القلب باللهجة الخليجية، والحكاية المعروفة بتقول إن كان في حبيبين بيتقابلوا كل يوم ويشربوا المشروب ده ولكن أهل البنت رفضوه لما اتقدملها، ففضل يشرب نفس المشروب في نفس المكان وهو حزين ومكسور القلب.
علشان نحضر عوار القلب، هنحتاج كوباية لبن زبادي، وكوباية فراولة، وحبة موز، ومعلقة عسل أبيض كبيرة، وحبة فراولة وحبة موز للتزيين.
هنخلط الفراولة، والموز، واللبن الزبادي، والعسل في الخلاط، ونصبه في كوبايات، ونزينه بقطع فراولة وموز.
عصير الطماطم
هنحتاج حبتين طماطم، وملح، وفلفل، وسكر.. وهنضربهم كلهم في الخلاط، ونصبه في كوباية.
الطماطم مفيدة لتقوية مناعة الجسم، فهي غنية بمضادات الأكسدة، وفيها فيتامين “أ” ، وفيتامين “س”، وبوتاسيوم، وفوسفور، وحديد، وكالسيوم، ومغنسيوم، ونحاس.