عملنا لكم من فترة قائمة من الأفلام الشتوية اللي أجوائها مليانة دفا وطيبة وكأبة في نفس الوقت شبيهه بالأجواء الشتوية، زي رسائل البحر وفوتو كوبي، والنهارده نازلين لكوا بمجموعة من الأفلام بمناسبة شهر الصيف اللي بادئها معانا جامد ونازل ضرب بدون رحمة، أفلام هتدخلك في مود الصيف والفرح والمرح وهتسفرك لمناطق وتفسحك.
جعلتني مجرمًا
“مارينا بتاعت الأغنيا؟” أغلب أحداثه بتدور على شاطئ مارينا، لما تقرر البنت المدللة اللي بتقوم بدورها غادة عادل إنها تحتال على والدها البخيل حسن حسنى وتقنعه بأنها مخطوفة علشان يدفع لها فلوس وينجدها، وأحمد حلمي هيقوم بدور المخطوف وهيقعدوا في الشاليه أهو منه يستخبوا ومنه يتفسحوا.
أبي فوق الشجرة
دقوا الشماسي على البلاج دقوا الشماسي، أشهر أغنية مرتبطة عندنا بالصيف اتغنت في أشهر فيلم أجوائه برضه كانت كلها صيف ومرح، فيلم للعندليب عبد الحليم حافظ بتدور أحداث القصة عن الطالب عادل اللي هيسافر إسكندرية علشان يقضي الصيف حيث الشماسي والفريسكا وهناك هيتعرف على شخص هيقلبله حياته.
سنة أولى نصب
حالة صيفية من الأحداث والأبطال والأغاني وحتى لبسهم، أحمد وخالد ونور وداليا رباعي هيعيش قصة حب هيزود من حرارتها الماء والخضرة والوجه الحسن والمناظر الطبيعية والأنشطة اللي بتتعمل في مناطق البحر الأحمر زي الغردقة اللي اتصور فيها الفيلم.
الزواج على الطريقة الحديثة
أحمد ومنى ولاد خالة اتربوا واتعلموا سوا لحد ما وصلوا للجامعة، معظم أحداث الفيلم وبداية شرارة الحب هتبدأ بينهم وهما في رحلة صيفية لمعسكر الجامعة على شاطئ من شواطيء اسكندرية، الأجواء والأغاني والألعاب اللي اتلعبت هناك هتديلك روح الصيف وتفكرك بصيف من بتوع زمان.
قبل زحمة الصيف
أجازة صيفية في قرية في الساحل الشمالي قلبت معاهم بمشاكل وخناقات، مع الدكتور يحيى (ماجد الكدواني) اللي حب يقضي الأجازة مع زوجته قبل زحمة القرية والساحل بالمصيفين وهناك هيتعرف على مترجمة شابة (هنا شيحا) هتحول الرحلة لشيء غير متوقع، ومع الدراما الي اتقدمت على نار هادئة هتعيش طول الفيلم أجواء صيفية ومناظر مريحة للعين هتهديلك أعصابك.
آخر كلمة: ماتفوتوش قراءة: لوحة مرسومة بتحكي معاني: أفلام اتعرفت بكادراتها المميزة