حنان ترك من الفنانات اللي ليها طابع خاص وجماهيرية كبيرة مستمرة لحد دلوقتي حتى بعد اعتزالها الفن وابتعادها عن الساحة لفترة طويلة. لإن كاريزمتها وروحها الحلوة والطفولية بالإضافة لأعمالها الفنية المهمة، لسه محفورة في أذهان الناس. فهي ليها أدوار عمرنا مانقدر ننساها ودايمًا بنردد مقولاتها من أفلامها في أيامنا العادية. علشان كده ماكانش غريب إن الكل يتحمس لما يعرف إن حنان ترك رجعت للفن من تاني من خلال فيلم صوتي جديد.
فيلم النداهة من بطولة حنان ترك والفنان هاني عادل، اللي شاركوا في الفيلم بأصواتهم فقط، نظرًا لطبيعة الفيلم الصوتي، ومن تأليف وإخراج خالد المهدي. الفيلم هيتعرض على تطبيق Storytel العالمي اللي بيضم آلاف الكتب الصوتية، والفيلم يعتبر أول دراما صوتية تتعرض في صالات عرض جماهيرية في مصر والعالم العربي.
الفيلم تم بالفعل عرضه في عيد الفطر، ولكن ماكانش كتير يعرف عن وجوده علشان كده حبينا نسلط الضوء على العمل السينمائي المختلف، اللي بيحرك خيال الجمهور ويسيب لهم حرية اختيار تصور الشخصيات والأحداث إلى حد كبير. الفيلم فيه أغاني مميزة ومؤثرة من غناء هاني عادل، وطبيعة الفيلم الصوتي تخلينا متفائلين من كم التطورات اللي بتشهدها صناعة السينما، اللي بتقدم أنواع وأشكال مختلفة من الأفلام تناسب كل الأذواق..