بحيرة النيزك موجودة في مدينة مرسى علم بجنوب محافظة البحر الأحمر في مصر، وبتتميز بنقاء لون مياهها الأزرق، والشعب المرجانية الجميلة اللي موجودة في قاعها، وهي مرتبطة بجمال الطبيعة، ومعروفة بكونها حمام سباحة طبيعي، فمياهها دافية في الشتاء وباردة في الصيف، وعمقها مبيزيدش عن 8 متر، ومساحتها حوالي تلات ألاف متر مربع.
واتسمت باسم “النيزك” لإن السكان المحليين للمنطقة بيظنوا إنها اتكونت علشان في نيزك وقع على الشاطئ فكون البحيرة بالشكل ده، ولكن الكلام ده مش مؤكد من علماء الجيولوجيا.. والبحيرة بتعتبر واحدة من أكتر الأماكن المفضلة للغطس في العالم، لبعدها عن تيارات المياه وده خلاها موقع آمن للغطس، وبيزورها السياح من كل بلاد العالم طول السنة علشان يستمتعوا بالتجربة الساحرية وبجمال طبيعتها، ويسترخوا في هدوءها.
البحيرة موجودة داخل محمية وادي الجمال، وقريبة من أماكن كتيرة جدًا لازم نزورها طول ما إحنا موجودين في مرسى علم، زيّ شاطئ حنكوراب، ونعمل سنوركلينج، وشجرة القلعان، ومحمية صمداي اللي نقدر نشوف هناك الدلافين، ومرسى فُجيرة، وخليج أبو دباب، وضريح أبو الحسن الشاذلي، وحُطام أبوغصون.
