حسن أبو الروس بين إثارته للجدل ومنعه من دخول الريد كاربت: هل يستحق الموضوع الضجة؟

من فترة ظهر حسن أبو الروس وبقوة على الساحة، وبقى حديث السوشيال ميديا أكتر من أي وقت بعد تعاونه مع دينا الشربيني في أغنية “فلتت مني”، اللي كتير من الناس كانوا مستنينها. ومن بعدها، بدأنا نشوف أكتر من ظهور لأبو الروس ودينا الشربيني على الريد كاربت في مهرجان الجونة، بالإضافة لبعض الإطلالات المختلفة اللي كان بيختارها خلال حضوره المهرجان.

فكان في أكتر من جدل بيدور حوليه، أولهم علاقته بدينا الشربيني. بعد ظهورهم المتكرر مع بعض، كالعادة بدأ يطلع إشاعات إن في حاجة مابينهم، وزادت الشكوك أكتر لما قامت غادة والي زوجة أبو الروس بإلغاء متابعته هو ودينا الشربيني من الانستجرام، وقاموا هما كمان بإلغاء متابعتها، رغم ظهور حسن أبو الروس وتأكيده إن دينا الشربيني مجرد أخت وصديقة مُقربة. وبعدها تم تداول أخبار عن نشوب خلاف بين دينا وحسن بسبب الموضوع، ويقال إن ده سبب منع حسن بعدها من دخول الريد كاربت.

منع حسن ابو الروس من دخول حفل ختام مهرجان الجونة

الفيديو من الصحفي خالد صواف ..

Posted by ‎قفشـــات الافــــلام‎ on Friday, October 22, 2021

أما الجدل التاني كان بسبب اختيارات ابو الروس لإطلالاته، طريقة كلامه والـ attitude العام بتاعه خاصةً في مهرجان الجونة. فانتشرت كتير من الكوميكس اللي بتوضح إنه hyper بزيادة وبعض هزاره بيبقى زائد عن الحد ومبالغ فيه.. فتم انتقاده للأسباب دي. ولكن تعرضه للهجوم، وفرحة البعض إنه ماقدرش يدخل الريد كاربت، خلى زوجة أبو الروس تطلع وتدافع عن زوجها، بعد ما قاموا الاتنين بمتابعة بعض من تاني على الانستجرام.

حسن ابو الروس

ما كفاية روشنة بقى

Video made by Mahmoud Maria

Posted by Asa7be Sarcasm Society on Friday, October 15, 2021

فدافعت مصممة الجرافيك غادة والي عن زوجها خلال منشور كبير على الانستجرام بعنوان “للي ميعرفش حسن ابو الروس”، وبدأت تسرد أسباب تخليه من أفضل الناس اجتهادًا وتأثيرًا على الآخرين. فكتبت: “حسن مبدأش السنة دي، حسن بقاله 10 سنين بيمثل وبيعمل ورش وشارك في مهرجانات عالمية زيّ أفينيون في فرنسا، حسن بياخد كل فرصة أنه يسعد اللي حواليه، أهله، صحابه، دار مسنين، أطفال ملاجئ، أو حتى ناس قابلها مرة في حياته في الشارع، ودي رسالته الحقيقية، نشر البهجة”.

وبررت كمان كونه مختلف عن الآخرين وقالت “حسن من صغره معروف بلبسه المختلف ومش خايف يبقى نفسه لدرجة إن صحابه في الشغل القديم عملوله تورتة على شكل قميص مشجر.. في فنانين كتيرة عالمية ومصرية حسن متأثر بيهم عندهم ذوق مختلف زيّ مايكل جاكسون، برونو مارس الأستاذ سمير غانم، فؤاد المهندس، أحمد زكي، شكوكو وغيرهم.”

آخر كلمة: إيه رأيكم في اللي حصل؟ هل شايفين إن الموضوع يستحق الضجة، ولا دي مجرد طريقة تعبيير عن النفس لا تستحق الحكم عليها؟

تعليقات
Loading...