بعد حلقة في برنامج يحدث في مصر مع الإعلامي شريف عامر، اللي كان فيه الدكتور مبروك عطية ضيف، مع بنت اتعرضت للعنف من زوجها، والتعنيف وصل للتهديد بالقتل، وأثناء المحادثة في الحلقة، مبروك عطية قال تصريحات خلت الناس تعمل حملة على السوشيال ميديا علشان يتوقف عن الظهور الإعلامي، خصوصًا إن فيه عدد مش قليل من الناس بيتابعوه و بيمشوا ورا أرائه اللي بيقولها باسم الدين.
البنت اللي بتحكي مشكلتها مع زوجها، اللي كان بيتاجر في الممنوعات وبيضربها باستمرار، وكان ناقصله شوية ويبقى بمواصفات المسيخ الدجال، الشيخ مبروك عطية رد على شكوتها وقصتها بإنها أكيد هي السبب وهي اللي استفزته علشان يضربها! وإن حتى الشخص اللي بيعتدي بالضرب على حد من غير سبب، ده يعتبر مريض نفسي، مش مجرم مثلًا؟
“ماحدش هيتجوزك بعيالك”.. “استحملي علشان ولادك”.. “فلوسه حلال ولا حرام مش قصتك”.. “طالما بيأكلك وبيأكل عياله يبقى إنسان رحيم”.. كل دي كوارث اتقالت في جمل بسيطة على لسان مبروك عطية ردًا على قصة البنت اللي اتعرضت لكل ده في زواجها، في تبرير للعنف والإهانة اللي وصلت في علاقة البنت بزوجها لإنه بيتف في وشها وبيكتفها بجنازير ويمنع عنها الأكل لمدة 20 يوم، وحدف عليها سكينة وفي وجود حد كبير من عيلتها علشان يحل الموضوع!
الرد على كل الجرايم دي كان إن البنات والستات “بتأفور” وبتبالغ في الحكي، التهمة اللي بتواجهها الستات في كل حاجة تشتكي منها، لحد ما بقينا نشوف كل الجرايم اللي بتحصل في حق الستات، القتل والتحرش والاغتصاب والإهانة، وكل ده الستات بتبالغ.. والمفروض إن دي “حقيقة نحطها قدام عينينا” زيّ ما الشيخ بيقول.
تبرير العنف والتعامل معاه إنه حاجة عادية وإن أكيد الست هي السبب، تطبيع العنف مشاركة في الجريمة، يعني كنا وصلنا لمرحلة بنقول فيها للناس إن السكوت عن الجريمة يعتبر مشاركة فيها، علشان نقول للناس إنهم لما يشوفوا الحق ويسكتوا عنه دي بتبقى جريمة وإنهم لازم يتصرفوا، لكن ماكناش نتوقع إن الظروف هتوصل لإننا نبقى بنتكلم في بديهيات زيّ إن تبرير وتطبيع العنف ده شيء مش مقبول.
الناس على تويتر شاركت بكلام كتير في القضية دي، تعالوا نشوف زيّ إيه.