في الفترة ما بين 30 مايو و6 يونيو، استضاف معرض “تراث مصر الجديدة الفوتوغرافي” عدد كبير من الصور واللوحات لمصورين موهوبين بالفطرة قدروا يوصلوا لنا أهم معالم مصر الجديدة بشكل مختلف وفريد.
المعرض قائم على فكرة إظهار جمال مصر الجديدة وتراثها الفريد اللي عايش معانا طول السنين اللي فاتت، وبيميزها عن باقي أحياء القاهرة بمشاركة أكتر من 50 صورة عن الحي وأهم معالمه زي قصر البارون وكنيسة البازليك اللي بيوصل عمرها لأكتر من 110 سنة.
قابلنا لوجين، مسئولة العلاقات العامة والسوشيال ميديا لفوتوبيا، وقالتلنا: “المعرض شراكة بين فوتوبيا وبين حي هليوبوليس، واللي كان متعاون جدًَا للشراكة دي، وقدملنا التساهيل عشان نعلق الصور في شوارع الكوربة وروكسي”.
وأضافت: “المعرض شهد إقبال كبير أكتر من المتوقع بيوصل لأكتر من 5000 زائر، وده خلانا نفكر في إننا نعيد الفكرة مرة تانية قريب، ونسيب مساحة لمصوريين مختلفيين يظهروا فنهم للناس”.
ووضحت لوجين: “لو كنت مصور وعايز تشارك في المسابقات اللي بتقدمها فوتوبيا في المرات الجاية، تابع صفحتنا على الانستجرام والفيس بوك، ومن خلالها بننزل إعلان كل فترة عن مسابقات مختلفة ومتنوعة، وبنختار أفضل الصور الممكنة للمشاركة في المعارض، والتقديم مجاني وبدون أي رسوم”.
فوتوبيا مش بس من الأماكن اللي بتستضيف معارض كبيرة زي معرض “تراث مصر الجديدة الفوتوغرافي”، ولكن بتمتلك ستوديو كبير للتصوير ممكن تأجره وتصور فيه أي سيشن، ومجهز بأحدث المعدات اللي ممكن يحتاجها أي مصور، وبيستخدمه ماركات عالمية معروفة زي ماركة “كارينا للملابس” اللي اختارت تصور منتجاتها الجديدة في الستوديو الخاص بيهم.
فوتوبيا فيها أماكن تقدر تقعد فيها الوقت اللي أنت محتاجه من غير أي إزعاج أو دوشة، و بـ100 جنيه، مع إنترنت متاح طوال اليوم وبدون حجز مسبق، والمكان مفتوح طوال أيام الأسبوع ماعدا يوم الأحد من الساعة 10 صباحًا لحد الساعة 7 مساءًا.
الطريق للمكان سهل وبسيط، ممكن تروحلها عن طريق محطة مترو الأهرام في الكوربة بمصر الجديدة، أو عن طريق استخدام جوجل وهيوصلك للمكان بسهولة.
فوتوبيا بتقدم حاليًا كورسات في مجال التصوير في كل المجالات زي تصوير الفاشون أو تصوير الأكل وبأسعار مميزة، تقدر تسجل فيهم من خلال زيارة اللينك الموجود على صفتحهم على الانستجرام.
