بوست على صفحة كلية العلوم جامعة الإسكندرية، بترقية معيد لمنصب مدرس في الكلية، حصل عليه غضب من آلاف الطلاب، سبب جدل وكومنتات بيحكوا فيها قصص سيئة لتعاملهم مع المعيد ده في مواقف مختلفة لما كان بيدرسلهم، من معاملة سيئة لتنمر لعدم تفهم، وانتشرت القصة على السوشيال ميديا بشكل كبير وبتفاعل كبير جدًا، والموضوع وصل لإدارة الجامعة وردوا بإن هيتم فتح تحقيق في الموضوع لإنه مش طبيعي مئات الآلاف من الرياكتس والكومنتس اللي بتعبر عن غضب الطلاب تجاه شخص واحد تكون حاجة عادية.
رئيس جامعة الإسكندرية قال إن الجامعة لم تتلقى حتى الآن أي شكاوى مكتوبة من الطلاب، وأكد على إنه في حالة ثبوت أي واقعة كانت محل الشكاوى هيتم تطبيق اللائحة واتخاذ الاجراء اللازم تجاه الدكتور ده، وفي حالة عدم ثبوت الوقائع هيتم توجيه الدكتور لتحسين معاملته للطلاب.
وحسب موقع فيتو، الدكتور محمود مرسي رد على الغضب اللي حصل ضده من الطلاب تجاه بوست الترقية بتاعه والجدل اللي أثاره، وقال “أنا لو باخد الطلبة غياب وأروحهم بدري، واتغاضى عن ريبورتات المعمل، واللي ييجي متأخر بساعة أدخله، والمتأخر اديله درجات زيّ اللي واقف في المعمل وتعب، كنت أخدت مليون لاف”