صحيت منطقة الواحة في مدينة نصر على أوراق متوزعة على كل العربيات في الشارع ومكتوب عليها: “توفيت عائلة في الواحة بسببك.. لو سمحت ممنوع الركن في اليوتيرن”.
وعرفنا من واحد من سكان المنطقة إن الرسالة دي كتبها السكان وطبعوها ونشروها على كل العربيات اللي راكنة في اليوتيرن؛ بسبب غضب السكان بعد الحادثة الصعبة اللي راح ضحيتها عيلة كاملة في حريق عقار في المنطقة.
وسبب موت لاعب النادي الأهلي السابق الكابتن خالد كمال زكي هو وعيلته بالكامل في حريق العقار صدمة قوية للسكان، بالذات إنه كان ممكن يتم إنقاذ العيلة لو وصلت عربيات الإسعاف والمطافئ لمكان الحريق في الوقت المناسب، ولكن للأسف ماقدرتش توصل بسبب العربيات اللي راكنة في اليوتيرن، وعلى ما جيه أصحاب العربيات اللي راكنة علشان يحركوها ويفتحوا الطريق للإسعاف والمطافئ كانت المساعدة متأخرة بالفعل والعيلة ماتت.
الكابتن زكي، 54 سنة، هو عضو النادي الأهلي وسباح ولاعب كرة الماء السابق، اشتعلت النيران في شقته اللي في الدور العاشر، وأكد سكان المنطقة إن الكابتن زكي كان بيحاول يلحق ابنه اللي عنده 4 سنين واللي حاول ينط من الشباك علشان يهرب من الحريق، ولما حاول زكي يتعلق في الحبل اللي الجيران نزلوه من الدور اللي فوقيهم أختل توازنه ووقع وهو حاضن ابنه وماتوا في الحال.
وخلال عملية الأطفاء، لقوا جثة بنته وهي طفلة عندها 5 سنين مختنقة بالدخان الكثيف، وحاليًا الجثث التلاتة في المشرحة وتحت تصرف النيابة العامة.
وقدرت قوات المساعدة تطفي الحريق وتسيطر عليه قبل ما ينتشر لباقي شقق العقار، وتم تحرير محضر بخصوص الواقعة وحاليًا بيشتغل المعمل الجنائي على الكشف عن سبب الحريق وتحرير تقرير مفصل عن الحريق بعد دراسة مكان الحادثة.