للتسهيل على المواطنين خصوصًا بعد إعلان مجلس الوزراء عدم السماح للموظفين بدخول المؤسسات والمنشآت الحكومية بدون شهادة إثبات الحصول على تطعيم فيروس كورونا، وزارة الصحة دلوقتي أطلقت تطبيق أو أبليكيشن “جواز السفر الصحي” واللي بيتيح دخول المواطنين عليه من الـ smart phones وتحميله بسهولة من google play وapp store، وهيكون بديل عن الشهادات الورقية، تعالوا نعرف أكتر عن الأبليكيشن.
حسب بيان وزارة الصحة، الأبليكيشن بدأ من يوم الأربعاء، على الموبايل، وبيبين حالة الشخص من تلقي اللقاح، ومزود كمان بـ QR code ,وبيتم قرائته في كل مطارات العالم، وبيعرف الشخص حصل على أنهي نوع من اللقاحات، التطبيق هيكون وسيلة بجانب الشهادات الورقية، وده هيسهل كتير على المواطنين في الإجراءات.
الأبليكيشن بيوضح موقف الشخص من التطعيم عن طريق 3 ألوان، اللون الأحمر معناه إن الشخص غير حاصل على اللقاح، واللون الأصفر معناه إن الشخص تلقى جرعة واحدة من اللقاح، واللون الأخضر معناه حصوله على الجرعتين. وعلشان تفعّل الأبلكيشن، هنقول لك بخطوات بسيطة:
في البداية بعد فتح الأبليكيشن، هتدخل رقم البطاقة أو جواز السفر، وبعدين تدخل رقم الطلب الخاص بالحصول على لقاح كورونا، بعدها هيتم إرسال كود لتأكيد رقم موبايلك المسجل على موقع تسجيل اللقاح التابع لوزارة الصحة، وهيطلب منك الأبليكيشن إنك تدخل الكود ده. وبعدها هتكون في 3 خطوات للتسجيل: التقاط صورة بالكاميرا من الموبايل، وتحديد الرمز السري، ودفع الرسوم اللي ثمنها حوالي 100 جنيه، وده باستخدام الفيزا أو بطاقة الائتمان.