الشتاء داخل علينا وعايشين فترة تقلب الفصول، والفترة دي مُعظم الناس بيجيلها برد، ودور البرد مزعج جدًا للكل. في ناس بيجيلها الدور بأعراض بسيطة وبتعدي بسرعة وفي ناس تانية الأعراض بتاخد معاهم وقت طويل وبيكونوا تعبانين أوي.
في خرافات كتير منتشرة عن أدوار البرد ومعظم الخرافات دي ليها مخاطر صحية وبتخلي دور البرد يفضل وقت أطول مع الناس وممكن يخلي الأعراض أسوأ. هنناقش هنا بعض الخرافات دي وندور على الحقيقة وراها.
1. الجو برد والتكييف هو اللي بيجيبلك دور برد، ولو خرجت وراسك مبلولة هيجيلك برد
أدوار البرد هي عدوى فيروسية بتسببها أنواع مختلفة من الفيروسات، والفيروسات دي بتحب تعيش في درجات الحرارة المنخفضة والمناطق الباردة والرطبة، وعلشان كده الفيروسات دي بتنتشر أوي في الشتاء، لكن فكرة إنك موجود في مكان بارد أو رأسك مبلولة مالوش علاقة بإن يجيلك دور برد أو لأ.
فيروسات البرد بتتنقل من خلال القطرات اللي بتفضل في الهوا لما حد مريض يكح أو يعطس أو يتكلم، وبتتنقل باللمس ومن خلال الفم والأنف والعينين. غالبًا في الشتاء بنقعد في البيت والأماكن المغلقة أكتر علشان بيكون الجو بارد برا، وعلشان كده كل ما بنبقى في مكان مقفول ونعمل contacts مع الناس اللي حولينا أكتر، كل ما فرصة إن نتعدي بتبقى أكبر.
2. المضاد الحيوي هيخليك تخف من أي دور برد
لأ. إياك تاخد مضاد حيوي وأنت عندك برد، غير لو الدكتور قالك إنك محتاج. دور البرد زيّ ما قولنا هو عدوى فيروسية، والمضادات الحيوية دي بتشتغل على البكتيريا، فإيه علاقة ده بده؟ الدكتور ممكن يقولك تاخد مضاد حيوي وأنت عندك برد في حالة واحدة وهي إن دور البرد خلى مناعتك ضعفت وفي بكتيريا عملتلك عدوى Secondary infection.
لما بناخد مضادات حيوية عمال على بطال كده بندمر صحتنا وبنخلي البكتيريا تكتسب مناعة ضد المضادات الحيوية وفى مستقبل قريب هيبقى في أنواع من البكتيريا اللي مش هنلاقي مضاد حيوي يشتغل عليها. فمن فضلك ماتاخدش مضاد حيوي غير لما الدكتور يكتبهولك ولازم تاخد الجرعة بالكامل.
3. عندي دور برد في المعدة
مفيش حاجة اسمها برد في المعدة، أعراض الألم اللي بييجي للناس في المعدة بيكون سببه عسر هضم أو عدوى بكتيرية ولازم تشوف دكتور. البرد نفسه مش بيسبب لك أمراض في المعدة. آلام المعدة ممكن تكون منتشرة أكتر في الشتاء علشان أدوار البرد بتكون منتشرة وده بيأثر على مناعتنا وبيخلينا عرضة للعدوى البكتيرية أكتر.
4. اللبن والجبنة والبيض والحمام والسمك بيزودوا أدوار البرد
مفيش أي أساس علمي بيثبت إن الأكلات دي بتزود البرد، وبالعكس المفروض تاكل ألبان كتير علشان مغذية وأدوار البرد محتاجة أكل متوازن ومغذي علشان تدعم مناعتك وتحارب الفيروس اللي مسبب لك دور البرد.
5. أدوار البرد محتاجة فيتامين سي والزنك والإشنسا
مفيش أي أساس علمي بيقول إن فيتامين سي والزنك والإشنسا بيأثروا على المناعة بشكل مباشر، والحقيقة كمان إن البرتقال والليمون مش أكتر فاكهة فيها فيتامين سي، أكتر فاكهة فيها فيتامين سي هي الجوافة.
وفي دراسات بتقول إن الجرعات الكبيرة من فيتامين سي والزنك ممكن يكون ليها آثار جانبية ضارة زيّ الحساسية وآلام البطن وممكن يآثر بشكل سلبي على حاسة الشم.
أهم حاجة تعملها مع دور البرد إنك ترتاح خالص وتشرب سوائل كتير وتتغذى كويس. وعلشان تتجنب أدوار البرد خليك في أماكن التهوية فيها كويسة واتأكد من إنك بتغسل ايديك كويس طول الوقت، وقلل أي احتكاك مع الناس المريضة. لو مضطر تكون في مكان فيه حد عنده برد، البس كمامة وعقم ايديك بالكحول كل شوية واتأكد إنك مش بتلمس وشك علشان ماتوصلش الفيروس للعينين والأنف والفم.