تطبيقات مكنتش تعرف إنك محتاجها في رمضان!

0

ساعات في رمضان بيكون صعب نركز على حاجات كتير في وقت الصيام في نفس الوقت زي صحتنا وأكلنا ونومنا والتمرين وشرب مية كفاية وقت السحور.

ومع صعوبة الامتناع عن الأكل والشرب، الموضوع بيكون شبه مستحيل إننا نقدر نحافظ على أسلوب حياة نكون راضيين عنه، الواحد بيكون شايل نفسه بالعافية. بس لحسن حظنا إحنا في القرن الواحد والعشرين وفي أدوات تكنولوجية كتيرة تقدر تساعدنا نحقق أسلوب الحياة ده وتسهل الدنيا علينا أكتر. كل اللي محتاجينه تليفون ذكي وشوية تطبيقات.

قررنا بما إننا في نص رمضان أهو، إننا نحاول نساعد اللي لسه مش عارفين يتعودوا على يوم رمضان وجمعنالهم مجموعة تطبيقات مختلفة هتقدر تساعدهم يظبطوا الدنيا. المهمة بتاعت التطبيقات دي إنها تساعدنا نمارس عادات صحية في الشهر الكريم وده هيخلي حياتكم أسهل وأسعد.

Ramadan Legacy

التطبيق ده من أحسن الحاجات اللي ممكن تكون على تليفونك في شهر رمضان. Ramadan Legacy بيعملك واجهة تفاعلية تقدر تحط فيها أهدافك وخططك لشهر رمضان الكريم، والـ”آب” كل شوية هيفكرك بيهم عن طريق مجموعة من الاقتباسات الملهمة.

Healthy Ramadan

الـ “آب” ده مهم جدًا خصوصًا لو إنت مش عايز وزنك يزيد في خلال شهر رمضان. طبعًا، ده بيكون صعب بسبب الأكل اللي يفتح النفس، بس مع كم الزيوت والسكريات اللي بتكون موجودة على السفرة في رمضان، لازم الواحد يكون عارف هو بياكل إيه وهل ده مفيد للجسم ولا لا. التطبيق ده مهمته إنه يعرفك إيه اللي المفروض تاكله وإيه اللي مش مفروض تاكله،وكمان هيعرفك إمتى المفروض تتمرن.

مسلم برو

التطبيق ده هيفكرك بمواعيد الصلاة في شهر رمضان وهو مُتاح على الـ”آبل ستور” و”جوجل بلاي” وسهل الاستخدام والتحميل.

Be My Eyes

شهر رمضان هو شهر للعطاء بنحاول فيه نحس بغيرنا ونعمل خير يعود على المجتمع كله بالمنفعة؛ التطبيق ده بيوصل المتطوعين بأقرب مستخدم ليهم فاقد لحاسة البصر عشان يقدروا يساعدوه لفترة محددة من الوقت.

Charity Miles

مفيش إحساس أحسن من إنك تساعد شخص تاني يغير حياته للأحسن؛ التطبيق ده مش بس هيساعدك تخلي حياتك صحية أكتر لكن هيشجعك كمان على إنك تكون شخص أحسن في المجتمع بتاعك خصوصًا في شهر رمضان.

HeadSpace

التأمل حاجة بتعتبر من أفيد الحاجات لجسمنا، كلنا بنحتاج نفصل من الحين للآخر، والتطبيق ده هيساعدك تعمل كدا عن طريق تمارين ذهنية زي التأمل والصبر، ده غير إنه هيساعدك تظبط مواعيد نومك.

SleepCycle

بمناسبة مواعيد النوم، كلنا بنحاول إننا نظبط نومنا عشان ناخد قدر كافي من الراحة يشجعنا على يوم شغل وصيام طويل، بس مع الحظر الموجود بسبب فيروس الكورونا، وبما إن ناس كتير بتشتغل من البيت دلوقتي، تظبيط النوم مبقاش شئ سهل زي الأول.

التطبيق ده هيتابع عدد الساعات اللي بتنامها وكمان هيراقب ضربات قلبك وإنت نايم، وأحلى حاجة فيه إنه هيصحيك بالنهار في الوقت اللي هيكون فيه نومك خفيف.

Atbaki

مينفعش رمضان يكون رمضان من غير الطبخ والنفس الحلو في الأكل. التطبيق ده هيكون دليلك للطبخ في الشهر الكريم لإن فيه أكتر من ألف وصفة لأكلات عربية وشرق أوسطية بالإضافة لمجموعة من الأطباق العالمية من أحسن شيفات في العالم.

شاهد

بتدور على حاجة تتفرج عليها في رمضان تسلي بيها صيامك؟ متشغلش بالك، شاهد عليه كل اللي نفسك فيه من مسلسلات وأفلام عربية.

أخر كلمة: هل في تطبيقات تانية نسيناها؟ عرفنا في الكومنتس تحت!

تعليقات
Loading...