تصريحات وزير الري بخصوص سد النهضة ومخزون مصر المائي

أكد وزير الري والموارد المائية، هاني سويلم، إن موارد مصر المائية مؤمنة بشكل كامل، وأضاف في مكالمة تليفونية في برنامج “الحكاية” مع عمرو أديب، إن الزيادة السكانية بتحتاج نسد العجز المائي اللي بيصاحبها.

وقال سويلم كمان إن مصر بتشتغل على تطوير تكنولوجيات جديدة لتدوير المياه وإعادة استخدامها، علشان تلبي احتياجات الشعب اللي بتزيد كل يوم مع الزيادة السكانية في الوقت اللي حصة مصر من مياه النيل ثابتة، وضح كمان إن حصة مصر من المياه حوالي 55 مليار متر مكعب، وإننا محتاجين أكتر من 100 مليار متر مكعب.

وضح سويلم كمان إن 97% من مياه مصر بتيجي من الأمطار اللي بتنزل على دول حوض النيل، وعلشان كده اعتبر التغيرات المناخية اللي بتحصل في دول حوض النيل مهمة جدًا بالنسبة لمصر.

تصريحات وزير الري يخصوص سد النهضة الأثيوبي

أما بخصوص المياه اللي بتستقطعها إثيوبيا لملأ سد النهضة، فأكد سويلم إنها ضمن نظام المياه في نهر النيل، وأعرب عن أمنياته بالوصول لحل مع إثيوبيا بخصوص قضية سد النهضة.

وأضاف إنه يتمنى يكون في حل في أقرب وقت لأزمة سد النهضة، وأكد إن مصر بتأمن الموارد المائية الخاصة بها من خلال تحديد تخزين في السد العالي، لضمان احتياجات المواطن المصري، وفي النهاية أكد سويلم إن كل مؤسسات الدولة المصرية بتحاول تأمن مياه مصر.

التغيرات المناخية ووضع الأمطار في مصر

وضح سويلم إن الوزارة بترصد خلال الفترات الأخيرة زيادة في كمية الأمطار اللي بتنزل على مصر، وقال: “في بعض أماكن مخرات السيول كنا بنحسب المخر أو البحيرة اللي بتجمع المياه لحماية المدن على أقصى مطر جه في 100 سنة لتصميم الأماكن دي، لكن لقينا إن ده مش كافي، وبدأنا نحسب على كمية جت في آخر 300 سنة، وده معناه أحجام أكبر من المياه وسعة تخزين أكبر”.

ووضح: “بنحاول لما بنخزن مياه من أمطار السيول نستخدمها في شحن الخزان الجوفي، علشان نعيد استخدامها في الري أو استخدامات تانية، عن طريق الضخ في الآبار، يعني بنستخدم تحت الأرض كخزان”.

وقال الوزير إن وزارة الري بتبذل مجهودات في تطهير الترع والمصارف وتأهيلها، علشان نحافظ على الموارد المائية من التلوث.

آخر كلمة: ماتفوتوش قراءة: 9 حقائق عن نهر النيل: من دوره السياسي في وحدة مصر لكذبة عروس النيل