كلنا بنحب الحيوانات الأليفة زيّ الكلاب والقطط، ولو مش بنحب نربيهم، فعلى الأقل بنتعاطف معاهم، لإنهم كائنات صغيرة وضعيفة، ومش متحكمة في حاجة، وماعندهمش صوت يسمعونا بيه هما عايزين إيه ولا محتاجين لإيه، ولو مش بنحب نتعامل معاهم خالص، فأقل حاجة ممكن نعملها إننا نتجنبهم.
ولكن للأسف، وحاشة بعض الناس وعدم أدميتهم وقلة رحمتهم بتخليهم يعملوا أفعال شنيعة، زيّ إنهم يأذوهم أو يقتلوهم أو يسمموهم، أفعال تقتل القلب، أفعال مابنفهمش إزاي قدروا يعملوها، وبالذات في كائنات جميلة صغيرة مش مؤذية زيّ الكلاب والقطط اللي بيتجولوا في الشارع علشان يدوروا على أكل من الزبالة، وتبرير الناس بيكون في إنهم عاملين دوشة أو بيبهدلوا الشوارع، واللي مش شايفينه سبب لفعل شنيع زيّ ده، لإن كده كده مفيش أي سبب أو تبرير لقتل الحيوانات البريئة.
افرأ أيضًا: بفيلم تسجيلي قصير.. حاجات متعرفهاش عن كلاب الشارع
والحكاية دي بتتكرر كل فترة، ومش بتخلص ولا بتنتهي، وظهر إعلان بيحذر من تسميم الكلاب والقطط البلدي في شوارع المعادي، وإن في حملة في الشوارع وماليينها سموم علشان يتخلصوا منهم، والوحش برضه إن ناس بتنزل تمشي كلابهم الخاصة اللي بيشموا وبيلحسوا الأرض فبيتعرضوا للأذى هما كمان، ولو فاكرين إن كلاب وقطط الشارع مفيش حد هيزعل عليهم، وده طبعًا غلط، ولكن كلاب الناس لما يتأذوا أصحابهم أكيد هيزعلوا عليهم.
قتل الكلاب والقطط جريمة ماينفعش يتسكت عليها، جريمة لازم تنتهي ويكون لمرتكبها عقاب، ولو تقدروا تنقذوا أي حيوان متأذي ساعدوه أو وفروله ملجأ أو وصلوه لأي دكتور بيطري اللي كتير منهم جدًا بينقذوا وبيحبوا يساعدوا في المواقف دي.