الساعة السكانية التابعة للجهاز المركزي للتعبئة العامة والإحصاء، واللي موجودة في كذا موقع في القاهرة، أعلنت من كام ساعة عن وصول عدد سكان مصر لـ 102 مليون و746 ألف مواطن في الداخل، وبكده بيكون تعداد السكان في مصر دخل الربع مليون التالت بعد المليون رقم 102.
وبعد الوصول للرقم ده بيكون تم تسجيل زيادة قدرها 250 ألف نسمة خلال 60 يوم بس، في حين إن أخر ربع مليون قبل ده أخد 50 يوم بس واللي تم تسجيله في يوم 13 من أكتوبر اللي فات. وأول ربع مليون بعد المليون رقم 102 كان تم تسجيله في 23 أغسطس من السنة دي. وكان وصل عدد سكان مصر لـ 102 مليون نسمة بالظبط في 5 يوليو من السنة دي.
وماتزال محافظة القاهرة في أول قائمة أعلى عشر محافظات في عدد السكان، واللي بلغ عدد سكانها في التحديث الأخير حوالي 10 مليون و92 ألف و319 نسمة، والجيزة جات في المركز التاني بحوالي 9 مليون و315 ألف و581 نسمة، وبعدها جات محافظة الشرقية بحوالي 7 مليون و740 ألف و637 نسمة.
وبالنسبة لتقديرات جهاز التعبئة لسنة 2021 كان عدد سكان مصر زاد من 72.8 مليون نسمة وفقًا لتعداد سنة 2006 وبعدين وصل لـ 94.8 مليون نسمة فى تعداد سنة 2017، وزاد لـ 101.5 مليون نسمة في 1/1/2021 بزيادة حوالي 7.1 مليون نسمة. وكانت بيانات آخر تعداد، (51.5٪ ذكور،48.5٪ إناث)، ووصلت نسبة النوع 106.1 ذكر لكل 100 أنثى.
ويعتبر المجتمع المصري مجتمع أغلبه من الشباب والفئة العمرية (أقل من 15 سنة) بتشكل حوالى ثلث السكان بنسبة 34.2٪ ونسبة الفئة العمرية (15ـ 64سنة) 61.9% واتقدرت نسبة السكان كبار السن (65 سنة فأكثر) 3.9٪ فقط في بداية سنة 2021، وبلغت نسبة سكان الحضر 42.9٪ بينما بلغت نسبة سكان الريف 57.1٪ في بداية عام 2021، وبلغ معدل الإعالة العمرية لإجمالي الجمهورية 61.6٪ في يناير2021.