إحنا وصلنا لآخر السنة يعني شهر ديسمبر يعني عيد ميلاد مجيد يعني كريسماس، والكريسماس هو تاني أهم عيد للمسيحيين بعد عيد القيامة، وبيحتفلوا بيه في الكنيسة الكاثوليكية يوم 25 من شهر ديسمبر بميلاد يسوع المسيح، والعيد اللي الناس كلها بتحتفل بيه حتى من المسلمين، وبنفضل مستنيينه من السنة للتانية، واللي بيرجع فينا روح الإيمان، وبيزرع فينا الأمل، وبيدينا إحساس بالأمان والحنان، وبيخلينا عايزين ندي كمان الأحاسيس دي مش ناخدها بس، هو عيد العطاء والحب.
وبنحتفل بتجمع العائلات والصحاب، وبنلم شمل الحبايب والقرايب، وبناكل أحلى الأكلات على العشاء، وبنحط شجرة الكريسماس ونزينها بالكور والأجراس والأنوار، والأطفال بيستنوا بابا نويل بالهدايا، وبنلاقي زينة وروح العيد في كل حتة في الشوارع والأماكن العامة والخاصة كمان، وأكتر حاجة بنعملها في شهر ديسمبر من أوله لأخره إننا نسمع أغاني وترانيم العيد اللي معظمنا بيسمعها بالإنجليزي، ولكن في أغاني وترانيم كتير حلوة بالعربي وبتدينا إحساس وروح العيد.. فتعالوا نسمعهم مع بعض.