لعبة الأقلام أو تحدي تشارلي بينتشر دلوقتي في المدارس بين الطلبة المراهقين بشكل أكبر، والتحدي بيعتمد على استحضار الجن والشياطين، وده أثار الرعب بين الطلبة وأولياء الأمور بعد التحذيرات من انتشار التحدي ده ووقوع حادثة بسببه في مدرسة إعدادية في إمبابة، إيه التحدي وحصل إيه لما بنات نفذوه؟
التحدي
التحدي ده مش أول مرة يظهر، لإن بدايته كانت في 2015، لكن الفترة دي منتشر جدًا على تيك توك وبيتفاعل معاه طلاب المدارس والمراهقين بدافع الفضول والتجربة، والتحدي بيشبه لعبة ويجا وبيقوم على التواصل الروحاني مع العالم الآخر.
اللعبة عبارة عن ورقة وقلمين، الورقة مكتوب عليها كلمتين (نعم) و(لا) وفوقهم قلمين رصاص على شكل (+) وبطقوس معينة بتتحضر روح علشان تجاوبهم على أسئلة عن طريق تحريك القلم في اتجاه الإجابة سواء كانت بنعم أو لا، اللاعبين بيقولوا “تشارلي تشارلي هل أنت هنا؟” أو “تشارلي تشارلي هل يمكننا اللعب؟” وبيجاوب تشارلي بتحريك القلم.
علماء النفس حذروا من اللعبة دي، وقالوا إن الأطفال اللي لعبوها حصل لهم أعراض غريبة زي رؤية ظلال وسماع ضحكات طفل خفي ورؤية كوابيس وتخيلات لأشباح، وحذروا الناس من التحدي أو اللعبة دي لإنها بتمثل خطورة شديدة.
حادثة مدرسة إمبابة
حسب ما قالوا شهود من المدرسة نفسها وأولياء أمور، 3 بنات من المدرسة زمايلهم شافوهم بيلعبوا اللعبة دي وهما قاعدين في دائرة على الأرض في حمام المدرسة، والبنات عاملين الورقة والأقلام بطريقة تحدي تشارلي وجرحوا نفسهم وبيستخدموا دماءهم كمان في التحدي، وبعد دقائق المدرسة تعرضت لحالة من الذعر بعد ما البنات خرجت تصرخ وبنت من اللي لعبوا اللعبة دي شكلها كان مخيف وحاولت تصيب زميلاتها بجروح وخنق، بعد ما بقت في حالة عصبية غير طبيعية، وبعدها الأمن المركزي تدخل وأخدوا البنات للتحقيق، وده اللي قالته زميلة لهم في المدرسة، وبشهادة أولياء أمور كانوا موجودين خارج سور المدرسة حكوا التفاصيل دي في فيديو لموقع صدى البلد.
وصرّح أشرف سلومة، وكيل وزارة التربية والتعليم بمحافظة الجيزة، في تصريحات خاصة لـ بوابة أخبار اليوم: “هناك تحقيق مع الطالبات بشأن ما حدث بمدرسة المستقبل الإعدادية بنات بحي إمبابة شمال الجيزة، وسوف يتم اتخاذ الإجراءات القانونية اللازمة حيال تلك الواقعة، ومن الممكن العقوبة تصل إلى نقل الطالبات من المدرسة”.
🛑 ده تحدي جديد بيعمله الأطفال في المدارس و بسببه الطفل عنده قطع في النخاع الشوكي و مازال في المستشفي و اغلب الظن انه هيصاب بشلل رباعي بسبب قطع في النخاع الشوكي.
فرجوا ولادكم علي الفيديو و فهموا ولادكم ان التحديات دي قاتله … التحديات دي ممكن تضيع مستقبلكم … و التحديات دي مش دليل علي قوتكم و لا إثبات لأي حاجه.
#أطفال_مفقوده
Posted by أطفال مفقوده on Wednesday, December 7, 2022
صرح المتحدث باسم منصة تيك توك: “إن سلامة وأمن مجتمعنا هي أولويتنا القصوى، لذلك فإن التحديات الخطيرة محظورة تمامًا من على تيك توك، وإذا صادف وجودها يتم إزالتها على الفور، كما أننا نوفر دليل مركز السلامة الخاص بنا والمصمم من قبل خبراء لمساعدة المستخدمين على تقدير المخاطر المتعلقة بالتحديات على الإنترنت واتخاذ خيارات آمنة”.